KHAWTHLIR

School Education minister Lalchhandama Ralte chuan nimin chawhnu khan Darlawna SSA Block Resource Centre (BRC)-ah sorkar hnathawkte a kâwm. Minister chuan, sorkar hnathawkte chu hun vawk dik ngai pawimawh tur leh an hnathawhna hmunah mipui pawh phâk leh dawr nuam taka awm turin a chah. 

Department of Pesonnel & Administrative chuan January 9, 2019 khan notification tichhuakin, senior advocate C Lalramzauva, Kulikawn chu Adviser to Chief Minister atan Governor-in a ruat thu an tarlang; principal secretary tlukpui a ni ang.

Traffic SP H Ramthlengliana chuan thupek chhuahin, January 17, 2019 zan dar 9 aṭanga zing dar 5 inkarah Bethlehem Veng - Tuithiang Veng - Chhinga Veng inkar kawngpuiah tui pipe phûm hna thawh a nih dawn avangin, hna thawh hun chhungin kawngah lirthei reng reng tlan phal a nih dawn loh thu a tarlang.

Chakma Autonomous District Council (CADC) chuan nimin khan ṭhutkhawm hmanhmawhthlak (emergency session) an nei a; CADC deputy chairman atan Durjya Dhan Chakma, MNF chu chuhtu awm loa thlan tlin a ni. CADC-a deputy chairman tur hian January 10, Ningani khan Durjya Dhan Chakma bakah, Onish Moy Chakma te chuan nomination an thehlut a; mahse, Onish Moy Chakma chu a inhnuhdawh leh avangin Durjya Dhan Chakma chu chuhtu awm loin a tling ta a ni. DD Chakma hi April 2018-a CADC inthlanah Kamalanagar North bialah MNF ticket-a thlan tlin a ni. 

Serchhip District leh Mamit District MJA-te chuan Ningani khan inhlantharna hun an hmang. Serchhip MJA-te chuan inhlantharna hun hi DIPRO K Saitluanga pisa-ah an hmang a, DIPRO chuan club building sakna atan cheng nuai 10 tihfel a nih tawh thu a sawi. Mamit MJA-te pawhin inhlantharna hun hi DIPRO Paul Rokima hoin a pisa-ah an hmang a, MJA building sak mek leh sak zawh tawhte a hmunah an en nghal.