Street vendor-te chungchang rêl

Nimin khan Mamit DC Conference Hall-ah district bawrhsap Dr Lalrozama hoin Support to Urban Street Vendors (SUSV) chungchang sawiho a ni a; Mamit SP office aiawh, Joint V/C aiawh leh street vendor aiawhte telin, thil chi hrang hrang an sawiho.

Kawngpui dunga thil zuar (hawker)-te mumal zawka an inzawrh dan tur leh hawker hmun atana Mamit GSA Playground chhim lam zauh belh chungchang ngaihtuah a ni. Survey thar bera a lan danin, Mamit khawpuia street vendor license nei mi 61 an awm a, license nei lo, street vendor ni nghet tawhte'n license an neih dan tur bawhzui turin UDPA office an ruat.

Dr Lalrozama chuan, kawngpui dunga thil zuartute chu faina leh thianghlimna kawnga ṭang leh zual tur leh, vengchhung hruaitute nen inpawh zawka kal turin a chah.