Sinlung Hills Council sorkar thar CM & Speaker hoin Sakawrdaiah lawm

Sinlung Hills Council (SHC) sorkar thar chu nimin khan Sakawrdai khelmualah lawm a ni a, chief minister Zoramthanga khuallian niin, Legislative Assembly speaker Lalrinliana Sailo khualzahawm a ni. Chief Minister chuan, SHC chhunga hmasawnna turin Mizoram sorkarin theihtawpa a puih tur thu a sawi.

CM Zoramthanga chuan, SHC-ah sorkar lailâwk (interim council) rei tak a din hnuah inthlanna hlawhtling taka zo a, sorkar pangngai din a ni ta chu lawmawm a tih thu a sawi a, "Sinlung Hills area hmasawnna turin state sorkarin theihtawpin a pui dawn. Hmasawnna ruangám duan tur ṭul tam tak a awm a, a remchan dan ang zelin kawng ṭha te, office, zirna-in leh healthcare lamahte hmalak a ni dawn," a ti.

Mizoram pum thlirin, hmasawn tura ngaihtuahna dik mipuiin an neih tlân a pawimawh thu sawiin Zoramthanga chuan, "Malsawmna hâi luhna turin ram pek kan ni a, chumi tur chuan kan inpeih a ngai. Ram zau ṭha tak, ruahtui 

ṭhatna, sik leh sa nuama chêng kan ni a, intodelh mai bakah, state páwna hralh chhuah tur nei thei tura malsawmna kan chante hi hausakna atan kan hman a ṭul," a ti a; chutiang tur chuan SEDP kaltlangin hmalak a nih dawn thu a sawi.

Assembly speaker Lalrinliana Sailo chuan, bul ṭan ṭhat a pawimawh thu sawiin, dikna leh rinawmna chhawm nung turin SHC sorkar thar fawng vuantute a chah a, "Hmasawnna tur sum lo kal turte leh staff thawktu tur lak chungchangahte ṭha taka bul ṭan ni se. A hmanna tur dik takah sum hman ni se, a mamawh leh phû tak takte hnen thleng ngei se. Hmasawnna tak tak hmu tur chuan ṭanrual leh thawhho a ṭul dawn a ni," a ti.

SHC huam chhunga khaw tam tak bialtu MLA Lalchhandama Ralte, minister of state pawhin thu sawiin, "Mipuite'n Pathian ráwn chunga hruaitu tur an thlan tlinte theihtawpa an ṭawiawm leh an ṭawngṭaipui a ngai dawn a ni," a ti a; sorkar bul ṭan tur, rahbi tuk chawp tur an nih avangin, mipuiin ṭha taka an thlâwpa an thawhpui a ngai dawn tih a sawi.

SHC chief executive member Lalthlamuana Hmar chuan, SHC siam theia mipui ṭawiawmna chungah lawmthu a sawi a, ṭha taka SHC sorkar ṭawiawm turin mipui a sáwm. HPC president Thanglianchhunga'n thu a sawi bawk.

SHC sorkar thar lawmnaah hian MLA pahnih Zothantluanga leh C Lalmuanpuia te pawh an tel a; khawtlang mipui ṭhahnem tak an pung khawm a ni.