Hotel enkawltute fimkhurna tur zirtir

Aizawl SP office chuan nimin khan an pisa conference hall-ah 'Awareness programme on drugs & arms traffickers/smugglers for hotel owner/manager’ an buatsaih a, DIG (Northern Range) Lalbiakthanga Khiangte-in a hmanpui.

Lalbiakthanga Khiangte, IPS chuan, khualbûk leh thlen-inahte mikhual chi tin chi tang an thlen avangin hotel enkawltute tan fimkhur a pawimawh thu sawiin, ruihhlo, silai leh rálthuam tawlhru leh mi ṭha lo an thlen loh nan fimkhur tur leh mi ṭha lote chu lo hnar ṭhin turin hotel neitute a chah.

DIG chuan, misualte hi an fimkhur ve tho ṭhin avangin hotel enkawltute tan misual leh mi ṭha hre turin fimkhur a ngaih thu sawiin, "Mikhual thleng turte chu lo chîk a, an rinhlelhawm em tihte leh an chanchinte chîk tur a ni a, mi ṭha lo an awm palh a nih chuan police-te hriattir vat tur a ni," a ti a; state ṭhenawm aṭangin hel pawl, Mizorama bihrûk tum an awm theih avangin chutiang lakah pawh chuan fimkhur a ṭul thu a sawi.

Aizawl SP C Lalzahngoa pawhin thu sawiin, Aizawlah zin veivâk, mi chi hrang hrang an tam tawh avangin khualbûk enkawltute kawng engkimah an fimkhur a ṭul tih hre reng turin hotel enkawltute a chah a; awareness programme an buatsaihah hotel enkawltute an kim thei lo chu pawi a tih thu sawiin, an mangan leh buaina an tawha an pun ṭhin chu police-te an nih angin, an puala police-in hun pawimawh an buatsaih chu ngaih pawimawh nacháng hre turin hotel enkawltute a chah bawk.

Awareness programme-ah hian police-in khualbûk an chhinchhiah 35 zinga 20 aṭangin aiawh an intír a; Aizawl additional SP KL Vulmawia'n mikhual thlen kawngah fimkhurna tur kawng hrang hrang, hriat tur pawimawhte leh danin a phûtte a sawifiah a ni.