State Games atana bial chhunga sum thawh tur bituk SYS-in an hriatpui lo

Kumin December thlaa Mizoram State Games neih turah Assembly constituency ṭhenkhat chuan an bial chhunga khuate leh sorkar department awmte pawisa thawh tur an bituk a, hei hian social media-ah sawisel a hlawh hle. Hei hi an hriatpui leh an thuràwn anga tih a nih loh thu Sports & Youth Services minister Robert Romawia Royte chuan a sawi a, "State Games atan cheng nuai 250 a awm," a ti.

December 9-13, 2019 chhunga Mizo­ram State Games (neih tur hi Assembly constituency 40-te intihsiakna atan hman a ni dawn a, inbuatsaihna hmasa atan SYS department chuan constituency tin chu Rs. 50,000 ṭheuh a pe. SYS aṭanga sum hmuh chu a tlem thama hriat vangin constituency ṭhenkhat chuan an bial chhungah sum thawh belh dan tur an ngaihtuah a ni.

Hriat theih chinah Ha­chhek consti­tuency chuan an bial chhunga khua (V/C) tinte chu sum thawh tur an tuksak a, V/C 11-te chu Rs. 10,000 thawh tura tih niin, V/C 13 dang chu Rs. 5,000 thawh tura tih an ni. Sorkar department hrang hrangte pawh sum thawh tura tih an ni a; department/office 17-te sum thawhkhawm tur zat chu Rs. 3,55,000 niin, thawh tam ber tur Zawlnuam BDO chu Rs. 1,00,000 thawh tura tih a ni. V/C 24-te leh sorkar department/office-te thawh tur tuk zat chu a vaiin Rs. 5,30,000 a tling.

Aizawl South-III bialah pawh an huam chhunga sorkar department/office hrang hrang 18-te leh khaw tinte (V/C 26) chu sum thawh tura tih an ni a, sum thawh khawm tura bituk belhkhawm chu Rs. 8,27,000 a ni. Sum thawh khawm bakah, thil dang aṭangin Rs. 1,20,000 hmuh an beisei bawk.

Assembly constituency ṭhenkhatin State Games atana sum thawh khawm tur an bituk chungchangah hian SYS minister Robert Romawia chuan Vanglaini palai zawhna chhangin, an hriatpuia tih a nih loh thu a sawi a, "Tihluihnaa sum dil a awm lo turah kan ngai a, State Games atana dan loa sorkar sum hman pawh a awm tur a ni lo. Dan loa sorkar sum lo tichingpen an awm palh chuan Games khel thei loa suspend theih an ni," a ti.

Robert Romawia chuan, "MLA bial tam takin ṭha­hnemngaiin jersey man tur leh ṭul dang atan donation/sponsorship an zawng a, sumdawng tam takin phûr takin an tihsak tih kan hria a, a lawmawm. Sorkar hotute'n dan ang thlapa sum tuak nana inhlawhnate an lo pe ve a nih pawhin a lawmawm hle ang," a ti a; MLA (LAD) fund hman dan guidelines tharah sport atan MLA-te'n an fund an hman theih tawh thu leh grant-in-aid angin sem theih a nih tawh thu a sawi.

Sports Minister chuan, Mizoram State Games atan Mizoram sorkarin cheng nuai 250 a ruahman thu sawiin, "A ṭul belh thut tâkin tiin Central sorkarah dil belh mek a ni bawk," a ti. Constituency tina Rs. 50,000 pek tur chu inbuat­saihna hmasa leh selection bik atan bial tin a inzat ṭheuha pek a nih thu sawiin Robert Romawia chuan, "A bak pawh pek belh an la ni dawn a, pek belh zat tur erawh chu player an thawh tam dan azirin a ni tawh ang a, bial tin chan a inzat tawh dawn lo. MLA bial tin aṭanga tel zat tur hi No­vember 22-ah a chiang dawn a, MLA bial tinte sum dawn zat tur tlangpui pawh a chiang tawh ang," a ti bawk.