KHAWTHLIR

Transport minister TJ Lalnuntluanga, Champhai South bialtu MLA hoa nimina Champhaia sorkar hotute, V/C-te leh tlawmngai pawl hruaitute ṭhukhawm chuan, Champhai khawpui chhunga lirthei nei thar, Transport department-a ziah luh (register) dawnah garage neite chauh register an rêl. Lirthei register turte chuan garage an nei ngei tih an veng V/C hriatpuina lehkha an neih a ngai tawh dawn a, chutiang lehkha nei lote chu motor register sak loh tura rèl a ni.

Lawngtlaia DC office leh District Child Protection Unit (DCPU) chuan November 12, Thawhlehni khan Lawngtlaia Central YLA Hall-ah Pro­ject Himna - MADAT (Mizoram Against Drugs, Alcohol & Tobacco) hnuaiah ṭhalaite fuih phûrna hun 'Youth Empowerment Summit 2019' an buatsaih. He hunah hian Lawngtlai SDO (Sadar) Rochuang­kimi Khenglawt leh DCPO Mary Lalremruati ten thu an sawi a, Lai House, Aizawla assistant resident commissioner David A Lalhmingchhuana'n ṭhalaite fuih phûrna thu a sawi bawk.

R Chaldailova lehkhabu ziah, ‘Mizo pi pute nunkhua’ tih chu nimin khan Ramhlun Indoor Stadium-ah Information & Public Relations minister Lalruatkima'n a tlangzarh. Lalruatkima chuan, lehkhabu chu mi dangte tan zir tur leh 

hriat belh tur hnu­­t­chhiahna lehkhabu a nih avangin, Mizo hnam ziaráng humhalhna kawngah rohlu tling a nih ngei a rin thu a sawi. Lehkhabu ziaktu R Chaldailova hi kum 91 mi a ni a, a lehkhabu hi phek 192-a chhah niin, Rs. 200 man a ni.

Chhinga Venga Be­thlehem Veng panna kawng pêng aṭanga Armed Veng taxi stand inkar kawngah PHE department-in tui pipe phûm hna an thawh mek avangin, zan dar 9 hnu lamah chuan kawngpuiah lirthei tlân phal a nih loh thu, Traffic SP Rodingliana Chawngthu chuan a tarlang. Chhun­ah leh zan tìr lamah pawh pipe phùm hna thawh hun chhungin lirthei khalhtu leh mipui kêa kalte fimkhur tur leh hna thawk tibuai lo thei ang bera kawng hmang tura chah an ni bawk.