IKK Ṭhalaite'n HIV/AIDS chungchanga hmalak an rél

18th February, 2020

Isua Krista Kohhran (IKK) Ṭhalai Pawl General Conference vawi 41-na chu February 14-16, 2020 chhung khan Lengpuiah neih a ni. Inkhawmpui hian kum 2020-21 chhungin HIV/AIDS awareness campaign kalpui a rél.

IKK Ṭhalai Pawl inkhawmpuiah hian February 15 khan Lengpui Community Hall-ah rorel inkhawm neih a ni a, rorel palai mi 184 an tel. An rorel zingah - HIV/AIDS awareness campaign neih te,

ṭhalaite tan career guidance buatsaih te, ram chhung rawngbawlna atan member tinin ni khat hlawh pekte a tel. Kum kal mek budget atan Rs. 5,52,000 an ruahman bawk.

Pathianni chawhma inkhawmah ram pum huapa article inziahsiak lawmman semin, hruaitu hlun chawimawina an hlân a; Pathianni zan inkhawmah kumpuan bawhzui ṭha lawmman an sem bawk. Inkhawmpui thupui chu "I duh zawng vana an tih angin leia mi'n ti rawh se" tih a ni.