Kolkata Mizo Students' kum 70-na an lawm

Kolkata Mizo Students' (KMS) chuan an kum 70-na, platinum jubilee chu November 12, Thawhlehni khan Salt Lake, Kolkata-a Mizoram House bula khelmual (IB Ground)-ah an lawm a, minister of state Robert Romawia Royte-in a hmanpui.

Tourism minister Robert Romawia chuan, Kolkata-a Mizo zirlai awmte duhsakna leh platinum jubilee lawmpuina chibai a bûk a; Kolkata leh a chhehvela Mizo zirlai kalkhawmte chu an zir laiah theihtawp chhuah a, Mizo hnam leh Mizoram tihmingṭhatu ni tur te, an zirna leh hnathawhnaah Pathian ṭihna nen fimkhur leh rilru nei taka hun hmang turin a fuih.

Robert Romawia Royte chuan, Kolkata khawpuia Zo chi péng hrang hrangte huapin Zo Kûtpui buatsaih tum a ni tih sawiin, "Hei hi Zo fate inpawh tawn nan leh insuihkhawm nan a pawimawh piah lamah, khawvel huapa Mizo hnam leh Mizoram a ṭha zawnga pho chhuahna ṭha tak a ni dawn a ni," a ti.

India ram khawpui dang aiin Kolkata-ah Mizote an tlangtla bik nia a hriat thu sawiin Minister chuan, "A chhan nia lang chu, Kolkata khawpuiin an ngaihsan tak tak Mizo footballer-te vang a ni," a ti. Zirlai kalkhawmte chu hnam dangte kâwm thiam a, an ṭawngte thiam tura fuihin, "Mizote tizahawmtu ni zel turin Kolkata zirlaite'n remchànna leh theihna in nei a ni," a ti a; Mizoram sorkarin Kolkata khawpui pawimawhna hriain Mizoram House building thar ṭha tak sa turin hma a lak mek thu a sawi bawk.

KMS Platinum Jubilee lawmna inkhawm hi an president Malsawmkima Zathang-in a kaihruai a, tuna Kolkata-a Mizo awm zinga awm rei ber tawhte zinga mi H Lallien Songate, IRS chu khualzahawm a ni. Kolkata-a Mizote an tel ṭha hle a, jubilee lawm nan tlaiah ruai an ṭheh.

Kum 1949 khan Calcutta-a Mizo zirlai awmte'n zirlai pawl an din a, a tirah chuan Mizo Zirlai Pawl tih a ni. A hnu deuhah Calcutta Mizo Students' tih a ni a, Calcutta khawpui hming chu Kolkata tih a nih hnuah, kum 2002 khan tuna a hming, Kolkata Mizo Students' tia thlak leh a ni. KMS hian West Bengal state-a district 23-a Mizo zirlaite a huam a ni.

Minister Robert Romawia hian Kolkata aṭangin New Delhi a pan a, November 15-a Union Sports Minister-in state hrang hrang sports minister conference a neihpui turah a tel ang.