YMA leh HSA-in CM-ah memorandum thlen

Sinlung Hills Council (SHC) huam chhunga pawl ṭhenkhat - YMA, Tuisualral group leh Hmar Students' Association (HSA), Sinlung Hills Joint Headquarters chuan nimina Sakawrdai tlawhtu chief minister Zoramthanga hnenah joint memorandum an thehlut a; an huam chhung hmasawnna tur thilte an thlen.

Joint memorandum-ah chuan, CM Zoramthanga zarah Mizoram hmar tlangdung tan káwl a êng ṭan nia sawiin, "Kan lawm tak zet a ni. He káwl eng tiêng zual turin kan ram chhung mamawh a hnuaia mi ang hian kan rawn thlen a, min tihhlawhtlinsak ngei dawn avangin kan lawm tak zet a ni," an ti.

Memorandum-ah hian Tuisualral group YMA aiawhin president HC Lalthanglura leh secretary H Lalzarliana te, HSA aiawhin president Lalsiamsanga Buhril leh general secretary Lalthlirlien Hmar ten hming an ziak a ni. 

1.    Mizoram leh Manipur inrìna Tuivai lei siam mai theih tura awm sa tihpuitlinsak turin.

2.    Vairengte - New Vervek NH-306-A hmar tlangdungin an chhawr ve ngei theih nana hma laksak turin.

3.    SHC chhungah sorkar treasury dah turin.

4.    Vaitin aṭanga Zilthawchhuah inkar kawng chu an púr châwk luhna leh ei leh bar an zawnna kawng pawimawh a nih avangin ṭha tâwka siam a nih theih nan PMGSY hnuaia dahsak tur leh a rang thei ang bera siam a nih theih nana hma laksak turin.

5.    Sorkar hna zawngtute’n hna ruak an hriat zung zung theih nan leh mi tam zawkin hna an hmuh theih nan SHC headquarters-ah Employment Exchange office dah turin.