Hmeichhiate inzirna tur hawng

Mizoram Science, Technology & Innovation Council (MISTIC) leh MHIP, Zemabawk Branch chuan hmeichhiate'n eizawnna ngêlnghet an neih theihna atan thawkhoin 'Enhancement of livelihood options for rural women in Mizoram’ project an siam a, nimin khan Zemabawk Middle School Venga MHIP building chunga Hmeichhe Training Centre sak thar chu chief scientific officer Dr. R.K. Lallianthanga'n a hawng.

Dr RK Lallianthanga chuan, project chu MISTIC-in an siam, sorkar laipuia Department of Science & Technology hnuaia Science for Equity, Empowerment & Development (SEED)-ah an thehluh a nih thu a sawi a, "SEED hian lo pawmin, MISTIC leh MHIP Zemabawk ten kan kalpui ta a ni," a ti a; Zemabawk MHIP nen kum 3 atan thawhhona thuthlung siam a nih thu a sawi.

Training centre leh project hawnna inkhawm hi senior scientific officer Samuel Lalmalsawma'n a kaihruai a, kal khawmte chu theihtawpa project hlawhtlin theihna turin ṭan la ṭheuh turin a sáwm. Report petu Davy Lalruatliana, scientific officer chuan, project hnuaiah ar leh vawk vulh dan bakah, ei leh in chi hrang hrang siam dante zir a nih dawn thu a sawi bawk. Project hawnna inkhawmah hian training turte bakah, Zemabawk MHIP, Local Council leh YMA aiawhte an tel a ni.