'BJP sorkar hlawhchhamna lantirna'

All India Congress Committee (AICC) observer leh Manipur Lok Sabha MP ni lai, Dr Thokchom Meinya chuan nimin khan Aizawl Press Club-ah thuthar thehdarhtute a kâwm a; AICC-in November 5-25, 2019 chhunga ‘BJP sorkar hlawhchhamna lantirna hun’ a kalpui mek chungchang sawi tura Mizorama lo kal a nih thu a sawi.

Dr Thokchom Meinya chuan, BJP sorkarin India ram an tih­chhiat dan AICC-in an aupui chu chi thuma ṭhen a nih thu sawiin, "Hna hmu lo (jobless/unemployed) tam ber ṭum a thleng mek. National Sample Survey-a a lan danin, prime minister Narendra Modi-a sorkarah hian kum 45 chhunga hna nei lo tam ber ṭum a thleng mek a ni," a ti a; hna a awm loh avangin zirlaite tan zir zelin awmzia a neih tur angin a neih theih loh thu a sawi a ni.

Thokchom Meinya chuan, "BJP sorkar hi India sum dinhmun tichhetu a ni. An sorkar kum nga chhungin cheng vbc. 1,74,225 chuang inrawlhna bank fraud case 2,500 vel a awm a ni," a ti a; financial year kal mek 2019-20 chhungin loneitute gross domestic product (GDP) chu 2%-in a tlahniam tawh tih a sawi.

Kut hnathawktute GDP chu a number ang chuan tlem viau angin lang mah se, nghawng a neih thui thu leh pawisa tihthihin a tum a ṭhelh thu sawiin Dr Thokchom chuan, "Black money, pawisa lem leh firfiakte'n sum an chhêk khâwl beih lêtna atana tihthih angin lang mah se, a takah chuan ram sum dinhmunin a chhiat phah hle. BJP sorkar chuan financial emergency leh indo hun atana Reserve Bank of India-in sum a dahṭhat Emergency Reserve chu BJP hamṭhatna turin an khawih a ni," a ti.

Thokchom Meinya chuan, Mizo­ram Pradesh Congress Committee president Lal Thanhawla kaihhruai party member-te rinawm­zia leh an hmaa tih tur awm hlen ṭhin mi an ni tih a hmuhin a hlim thu a sawi a, "Hun a kal ang a, Congress party hian Mizoramah sorkarna a chan leh vat ka beisei," a ti bawk.

Dr Thokchom Meinya hi MPCC Media hruaitu te, Lok Sabha MP hlui CL Ruala, minister hlui PC Zoram Sangliana leh AICC incharge  Zarliana ten an ṭawiawm a ni.