Champhai Master Plan Committee an ṭhu

Champhai khawpui leh a chhehvel chei-bâwl­a hmasawnna ruhrel siam dan tur ngaihtuahin nimin khan Champhai Master Plan Committee chu Champhai South bialtu MLA TJ Lalnun­tluanga, minister of state hoin DC conference hall-ah an ṭhukhawm.

TJ Lalnuntluanga chuan, Champhai hma lam hun atan master plan tharthawh leh a nih thu sawiin, "A bul ṭanna chauh la ni mah se, hlawhtling  tur chuan a tak taka hna thawh a ngai. UDPA department lama mithiamte kaih­hruainain zirchianna zau zawk leh mipui ngaihdan lak a ni ang," a ti a; master plan leh leilet vawnhima tihchangtlun tumna kawngah ṭha­hnemngai taka hotute ṭawiawma thuràwnte pe turin mipui a sáwm.

Minister chuan, "Champhai hi Mizorama Building Regulations nei hmasa ber ni turin hmalak a ni a, Road Safety Council pawh chak zawka kalpui a ṭul," a ti a; leilet phai vawnhim leh khawpui mamawh dah pawimawh chunga hmalak tum a nih thu a sawi.

Champhai bawrhsap SL Naveen pawhin thu a sawi a, UDPA assistant director R Lalhmangaihzuali'n Champhai Master Plan leh a kaihhnawihte a sawifiah. Committee chuan Champhai khawpui tâwt zel tur venna atana hmalakna tur hrang hrang an rêl bawk.

Meeting-ah hian Champhai SP Rex Zar­zoliana Vanchhawng, SDO (Sadar ) Zoremthara Ralte, sorkar department­ hrang hrang hotu te, tlawm­ngai pawl leh khaw­tlang hruaitute an tel a ni.