Mamitah One Stop Centre hawng

Nimin khan Mamita Sakhi One Stop Centre siam thar chu district bawrhsap Dr Lalrozama'n a hawng. One Stop Centre hi sorkar laipuia Ministry of Women and Child Development bultuma buatsaih a ni.

Dr Lalrozama chuan, Mamita Sakhi One Stop Centre hawn a ni ta chu lawmawm a tih thu leh a buaipuitute fakawm a tih thu a sawi a; hmei­chhia, hleilenna chi hrang hrang vanga harsatna tâwkte lungmuang taka hahchawlhna tur a nih angin, harsatna neite chu inthlahrung loa pan turin a sáwm a ni.

Sakhi One Stop Centre hawnna inkhawm hi Mamita ICDS district prog­ramme officer Lalrinpuii'n a kaihruai a, district centre administrator Lalruatpuii'n One Stop Centre-in a tum leh hnathawh tlangpui a sawi a; Mamit SP Shashank Jaiswal-a'n thu a sawi bawk.

One Stop Centre-ah hian centre administrator hoin thawktu pariat an awm a; bed room (khum panga), counselling room, DCA room, choka leh bual-inte bakah, guideline-in a phût angin refrigerator, computer, printer, laptop, almirah, inverter, dawhkan leh ṭhutthlengte a awm. Centre pantute chu ni nga leh zan nga a awm theih dawn a, fa nei tan pawh hruai tel theih a ni.