Nu pawngsualtu kum 20 a táng dawn

J Lalruatsanga (21) s/o Lalzova, Rúlkual, Lawngtlai district chu an khaw ṭhenawma nu pakhat hriamhrei hmanga vau beta a pawngsual avangin kum 20 chhung jail-a táng tur leh Rs. 1,000 chawi tura hrem a ni.

He thubuai chung­changah hian Lunglei District & Sessions judge Joel Joseph Denga chuan November 11, 2019 khan judgement order a ti­chhuak a; order-a a lan danin, J Lalruatsanga hian a thurualpui tleirawl pakhat nen December 26, 2015-ah an khaw ṭhen­awma nu pakhat, pasal nei lai chu chemtê nen vauin, tihluihna hmangin motor-in khaw dáiah an hruia a, an pawngsual a ni.

He pawngsual thu­buaiah hian J Lalruatsanga chu Indian Penal Code (IPC) Section 376D leh 342 hmanga thiam loh chantir niin, kum 20 chhung táng tur leh Rs. 1,000 chawi tura hrem a ni a, pawisa a chawi loh chuan thla khat dang a tàn belh ang. A thurualpui erawh chu kum tling lo a nih avangin Juvenile Justice Board hnenah hlan a ni.

Lunglei District & Sessions Judge hian November 11 vêk khan November 19, 2017-a mipat hmeichhiatna lam rawngkaia hmeichhe naupang chhaihtu (sexual harassment without touching) Ramesh Soren, Bunghmun, Lunglei district chu thiam loh chantirin, hremna a tichhuak bawk.

Ramesh Soren thubuai hi POCSO Act hnuaiah ziah luh a ni, Court chuan ni 65 chhung táng tur leh Rs. 20,000 chawi turin a hrem a ni.