Police Headquarters building thar hawn a ni Ruihhloa fihlim tura hmalak a pawimawh - CM

Police headquarters-a building pui ber sak thar chu nimin khan chief minister Zoramthanga'n a hawng. Chief Minister chuan, kawng hrang hranga police tihhmasawnna turin sorkar laipuiah project thehluh a nih tawh thu a sawi a; ruihhloa fihlim tura hmalak a pawimawh thu a sawi bawk.

CM Zoramthanga chuan, Police headquarters building thar chu Mizoram Police tihchangtlunna tura a bul ṭanna chauh a la nih thu sawiin, district, sub-division leh outpost-ahte police hmunhma thuam ṭhat ngai a awm tamzia a hriatpui thu a sawi a, "Police infrastructure development chungchang hi sorkar laipuiah minister bulah ka thlen tawh a, project-te siama thehluh a ni tawh," a ti. Police tichangtlung turin thawktu indaih lohnaah emaw, uniform emaw, ralthuam ṭha zawk a ni emaw, theih­tawpa hmalak a nih tur thu a sawi.

Zoramthanga chuan, "Ruihhlo leh zu-ah buai tâwk kan tam a, hemi hi kan tan chonaah lain, fihlim tura hma kan lak a pawimawh," a ti a; Mizoram police-te chu theihtawp chhuah zel turin a fuih.

Chief Minister chuan, Mizoram chu state lian lo, mihring pawh tlemtê awmna ni mah se, kawng ṭhenkhatah India rama hma hruaitu nih theihna nei a nih thu a sawi a, "Hun rei tak rambuai ni tawh, tuna state rálmuang ber pakhat kan nihna hian ṭhenawm ramah leh hmarchhak state zinga remna palaia ṭang thei dinhmunah min dah a, remna siam hna thawk turin sàwmna kan hmu reng a ni," a ti.

Home minister Lalchamliana chuan, Mizoram police chu India rama police ṭha ber zinga chhiar theih an nia a hriat thu sawiin, "Zirchianna ṭhenkhat hmuh theihah India ram pum huapa police case chinfel aiin Mizoram police-te case chinfel a lêt dáwnin a sang zawk," a ti a; chu chuan Mizoram police-te chu inkaihhruaina ṭha leh a taka mipui tan thawk ṭhin an nihzia a lantira a hriat thu a sawi.

Police Headquarters building thar hawnnaah Home minister Lalchamliana chuan, tuna Mizoram police hnathawh tawhah duh tâwk mai loin, tih turte ṭha leh fel taka thawk thei turin rilru put chhunzawm zel a ṭul thu a sawi a, "Hotute mitmei vèn vang chauh ni loin, mahni inthunun theihna vawn reng a pawimawh," a ti.

Home Minister chuan, district thar pathuma mi tur leh post âwl hrim hrim awmte chu hnawhkhat tura hmalak a nih thu sawiin, Zokhawthar leh Dungtlang outpost siamṭha turin sorkarin phalna a pek tawh thu leh outpost awm lohna hmun pathumah siam phalna hmuh a nih tawh thu a sawi a; police-te'n hmanrua ṭha zawk an neih theih nan hmalak a nih thu te, misual hnu chhui nan ui fing squad siamin training neih mek a nih thute a sawi bawk.

Chief secretary Lalnunmawia Chuaungo chuan, Police Headquarters building thar ṭha peih a ni ta chu lawmawm a tih thu sawiin, thawktute'n an mawhphurhna ṭha taka an hlen zel a rin thu a sawi a; "Chutihrual chuan, hmasawnna hi building ṭhaah te, hmanrua ṭhaahte teh awl viau ṭhin mah se, mihring thiamna leh theihna, ngaihtuahna leh hnathawh dan phungin hma a sawn hian a hlâwk ber ṭhin a ni," a ti.

Director general (DGP) SBK Singh pawhin thu sawiin, Mizoram Police chu India rama police force ṭha ber ni turin theihna an neih thu a sawi a, "Police zinga zu leh ruihhloin a tihbuaite chu an ngawlveina laka chhanchhuak a, police mai ni lo, mipui vantlang zingah ruihhloin harsatna a thlente tirêm turin project siam a ni a, hmalakna hrang hrang siam a ni tawh," a ti. Venhimna kawnga hma thar lain thil chi hrang hrang tih thar a nih thu a sawi bawk.

Police in thar hawnna inkhawm hi IGP John Neihlaia'n a kaihruai a, deputy speaker Lalrinawma, deputy govt. chief whip Lalrintluanga Sailo leh MLA dangte pawh an tel. Police Headquarters in thar hi DoNER aṭanga sum hmuh cheng nuai 1555.79 hmanga sak a ni a, North East Consultancy Services (NECS)-in July 2015-ah sa ṭanin, December 2019-ah an sa zo a ni.