Birth & death certificate-ah April 2021 aṭangin digital chauh pawm tawh dawn

Nimin khan Planning and Programme Implementation department conference hall-ah Inter Departmental Coor­dination Committee (IDCC) on  Registration of Births and Deaths an ṭhukhawm a, chief registrar of births and deaths Dr C Vanlalramsanga'n a kaihruai. Birth certificate leh death certificate chu April 2021 aṭangin digital certificate chauh pawm tawh turin an rél.

IDCC meeting chuan, sorkar laipuia Ministry of Home Affairs duh dan angin birth leh death certificate-te digital-a siam chu ṭha an ti a, department lam pawh an inpeih thawkhat tih tarlan a ni a, digital certificate chu April 1, 2020 aṭangin hman ṭan an rél a ni. Meeting-a an rèl dan chuan, mipui tan remchanna siamsak tur leh digital certificate awmzia leh nihphung inhrilhfiah a nih theih nan April 2020 aṭanga March 2021 thlengin  tuna certificate hman mek chu official thilah pawm a la ni dawn a; April 2021 aṭang erawh chuan official thil reng rengah digital certificate chauh pawm a ni tawh ang.

Digital certificate hman a nih hunah chuan khawi hmun aṭang pawhin internet hman theihna apiangah, mahni birth certificate-te chu awlsam takin a lak chhuah (download) theih dawn a ni. Mizoram sorkarin Mizoram Registration of Births and Deaths (Amendment) Rules, 2019 a tichhuahah, judicial magistrate first class tih chu executive magistrate tia a thlak avangin, chhan eng emaw vanga pian hlima inziak lut lo, a hnua birth certificate la chhuak leh duhte hnena pek chhuah phalna chu DC office-a executive magistrate kutah a awm tawh dawn a ni. District tinah DC-te'n delayed registration khawihtu tur executive magistrate ruat se, tiin an rél bawk. District thar pathum - Hnah­thial, Saitual leh Khawzawl DC-te chu IDCC member-ah telh ni se, District Economics and Statistics pisa din phalna sorkarah dil thuai ni se, an ti bawk a ni.