Siaha dist-ah in sak ṭanpuina dil 1,421 Ṭanpuina diltu mi 137 hnâwl an ni

Siaha District Screening Committee chu nimin khan district bawrhsap Bhupesh Chaudhary hoin an ṭhukhawm a, Pradhan Mantri Awas Yojana (PMAY) - Housing for All (Urban) Mission hnuaia hmalak dan tur an sawiho. Sorkar kum kal mekah Siaha district-ah hian in sak ṭanpui dilna 1,421 a lut tawh a, chu'ng zinga 137 chu department-in an enfiah hnuah hnâwl a ni tih an tarlang.

Ṭhutkhawmah hian PMAY-Housing for All hnuaia in sak ṭanpuina diltute dilna thlirho a ni a, sorkar kum kal mekah dilna lut zawng zawng 1,421 aṭangin dilna dik tâwk lo leh felhlelte chu department-in uluk taka an endik hnuah 137 hnâwl a ni.

Dilna hnâwlte chu a tlangpuiin in leh lo nei sa te, in khat aṭanga dilna pakhat ai tam awm te, ṭanpuina hmu tawh dil nawn te, khawpui huam chhunga awm lo te, sorkar hnathawk, scheme-in a huam chin aia hlawh tamte an ni. Meeting chuan, spot verification uluk leh felfai taka kalpui leh turin ruahmanna an siam a ni.

Meeting-a an tarlan danin, February 2, 2016-ah Ministry of Urban Housing Affairs-in Siaha district tan cheng nuai 3,180 a pawm tawh angin Siaha District Screening Committe meeting hmasa ber chu October 21, 2016-ah neih a ni. Detailed project report (DPR) hmasa berah mi 1,590 an awm a, a vawi hnihnaah mi 955 an awm.

Ministry chuan DPR hmasa ber 

aṭanga thlan mi 544-te tan cheng nuai 326.4 chu March 26, 2016-ah a pe chhuak a, chuchu October 3, 2018-ah UDPA Housing for All, Siaha bank account-ah thun a ni.

UDPA Directorate aṭangin DPR hmasa bera beneficiary 544-te aṭangin mi 217-te chu first instalment dawng tura thlan an ni a, tun thlenga beneficiary-te hnena pawisa sem tawh chu cheng nuai 227.1 a ni. Tun dinhmunah hian foundation stage-ah beneficiary 137, lintel stage-ah 141, roofing stage-ah 77 leh completed stage-ah 20 an awm.