CYMA hruaitute HIV/AIDS sawipui
Health & Family Welfare minister Dr R Lalthangliana sawmna angin Central YMA hruaitute chu nimin khan minister pisaah lêngin, HIV/AIDS dona kawnga hmalakho dan tur an sawiho. Minister chuan, HIV/AIDS dona kawngah kohhran leh tlawmngai pawlte nen ṭanrual a ṭul thu leh, an veia an ṭanrual chuan a dona kawngah hmasawnna a awm ngei a beiseiawm thu a sawi.
Health Minister chuan, kum 2019 chhunga Mizorama HIV dinhmun thar ber sawiin, "Mizoram dinhmun a sang filawr ta hi a veiawm hle. CYMA hi Mizorama pawl lian ber leh huam zau ber a nih angin, Mizote tan YMA a awm hi malsawmna leh Pathian remruatna ropui tak a ni," a ti.
Dr R Lalthangliana chuan, HIV dona kawngah YMA-te nen chak tak leh awmze neia an thawhho ngei a beisei thu sawiin, "Kohhranah pawh kan ngennain rah ṭha a chhuah mek a, Presbytery inkhawmpuiah pawh HIV-in sawi a hlawh a, a lawmawm. Hetianga kan veitlana kan ṭanrual chuan HIV do kawngah hma kan sawn ngei a beiseiawm," a ti a; HIV/AIDS donaah beihpui thlak a ngaih avangin tun hnaiah doctor pawlte leh kohhran hruaitute pawh an sawipui tawh tih a sawi.
Inkawmnaah hian CYMA aṭangin office bearer-te an tel a; CYMA president Vanlalruata chuan, HIV/AIDS donaah YMA a tlânchhe dawn lo tih sawiin, "YMA chuan a phak tâwkin HIV do kawngah theihtawp a chhuah dawn a, mahse, kan ram milin, eng nge ṭha ber ang tih kan ngaihtuah leh sawiho tlan a ṭul ang," a ti.
Sawihonaah hian Health Minister ṭawiawmtu Mizoram State AIDS Control Society (MSACS) hotute'n chhawpchhuah eng emaw zat an nei a; chung zingah chuan - HIV/AIDS chungchang YMA chanchinbua chhuah, thlân laih leh khawhar lènpuinaa inzirtirna lam sawi, CYMA bultumin Aizawla YMA branch-te kohkhawma sensitization programme buatsaih, HIV hrik pai ART damdawi ei chhunzawm lo te YMA puihnaa chhui chhuah, HIV dinhmun hre tura thisen endikna zau taka kalpui chungchangte a tel.
HIV/AIDS sawihona tlangpui
1. HIV/AIDS chungchang YMA branch hrang hrang chanchinbua chhuah, thlân laihna leh khawhar lênpuinaa sawi tam.
2. CYMA bultumin Aizawla YMA branch-te tan HIV sensitization programme buatsaih a, a senso MSACS-in tum se.
3. HIV dona kawngah CYMA leh MSACS-te thawhhona coordination committee din.
4. HIV darh zel tur venna (harm reduction) turin ruihhloa inchiu ṭhinte'n hriau thianghlim awlsawm zawka an hmuha an hman theih nan damdawi zuarte hnen aṭanga an lei theih nan hriatthiamna zau zawk awm thei se. CYMA hmalaknaa home/centre-a dah luhte reng reng HIV an kai leh kai loh enfiah theih ni se.
5. HIV hrik pai ART damdawi ei chhunzawm lote YMA puihnaa zawn chhuah.
6. SRS tihchak nan MSACS aṭanga counsellor pakhat dah.
7. Mi tam zawk thisen endik a nih theih nana thawhho.