Chakma foreigner hnawh kîr zat tarlanna MPC party-in CS an hlân
MPC party hruaitute chuan nimin khan Chief Secretary hnenah Chakma foreigner Mizoram aṭanga thawn kîr tawh zat chhinchhiahna bu an hlân.
Chakma foreigner thawn kîr tawh zat chhinchhiahna Chief Secretary hnena hlannaah hian MPC party aiawhin general secretary pahnih VL Ṭhazova leh Pawibawia Sailo te an kal a ni. Hemi chungchanga thuchhuah an siamah, PC (Peoples Conference) party sorkarin rambuai karah ram leh hnam hmakhua ngaih vanga Chakma foreigner hnawh kîrnaah nasa taka hma an la thei a nih chuan, chu aia nasa chuan tuna MNF kaihhruai sorkarin Chakma foreigner-te dap chhuaka thawn kîr hna an thawk thei ngei tura an ngaih thu an tarlang.
MPC tarlan danin, Brig. T Sailo kaihhruai PC sorkar lai, kum 1978-1983 chhungin India sorkar, Indian Army leh BSF sipaite nen ṭang rualin dan loa Mizorama lut rû Chakma foreigner mi 11,169 Bangladesh ram lamah hnawh kîr an ni. Kum khat chhunga an hnawh kîr dan chu - kum 1988 chhungin mi 151, kum 1989-ah mi 8,897, kum 1980-ah mi 978, kum 1981-ah mi 204, kum 1982-ah mi 628 leh kum 1983 chhungin mi 261 an ni.