Aizawlah Páwl Kût hman a ni

Nimin khan Lammualah Páwl Kût hman ṭan a ni a, vawiinah hman chhunzawm a ni dawn.

Nimina Kût hmannaah Social Welfare minister Dr K Beichhua chu Kût Thlengtu a ni a; Beichhua chuan, sorkarin Páwl Kût a ngaih pawimawh thu sawiin, "Mizo nun hluia ze ṭha leh hlu, ṭhangtharte'n an chhawmnun zel theih nan kût hi buatsaih a ni a, khualzin hîpna tur leh Mizo culture leh tradition chawi nun zela humhalh zelna tur atan hman tur a ni," a ti a; Páwl Kût chu chief minister Zoramthanga'n a phûrpui thu a sawi.

Art & Culture director R Hming­than­zuala pawhin thu sawiin, "Pawl Kût hi inlungrualna kût, hlimna leh ṭhangtharte nuna Zo nun ze mawi chawi nun zelna tur a ni," a ti. Pawl Kûtah hian Mizo infiamna chi hrang hrang, painting exhibition/competition, photo exhibition, Mizo hnam làm leh thuam hrang hrangte entir a ni a; Mizo ei leh in chi hrang hrang pho chhuah a nih bakah, middle school leh secondary high school zirlai naupangte tan Mizo hnam lam leh pipu zai intihsiak buatsaih a ni.