Naupangte nen Children's Day hman a ni

Nimin kha Children's Day (Naupangte Ni) a ni a, Mizoram hmun hrang hrangah hman a ni. Naupangte chu intihhlimna hun hman pui an ni a, hlim taka hun hman a ni.

Aizawlah chuan Women & Child Development department, Mizoram State Child Protection Society (MSCPS) leh Eternity Partners-te huaihawtin City Park-ah hman a ni a, Social Welfare minister Dr K Beichhua'n a hmanpui.

Dr K Beichhua chuan, naupangte chu an hma lam hun thlir thiam tura chahin, "In hringnuna in thil tum tur chu high school-ah thlang fel ang che u," a ti a; ram leh hnam hma hun an kuta a innghah thu sawiin, chutiang atan chuan ruih theih thil laka inthiar fihlim a ngaih thu a sawi.

Children's Day pual hian Raj Bhavan-ah pawh hun hman a ni. Governor PS Sreedharan Pillai ruahman angin Aizawla sikul panga - Boys ME School, Bethlehem Vengthlanga Rev. Thianga P/S, Chanmari-a Model English P/S, College Venga Model English Medium P/S leh Ramhlun North-a Model English Medium P/S-a zirlaite chu Raj Bhavan fan kualpui an nih bakah, intihhlimna hun hmanpui an ni. Naupangte Ni puala Raj Bhavan-a hun hmanah hian Multipurpose Hall-ah inkhawm tawitê neih hmasak a ni a, secretary to Governor K Lalthawmmawia'n naupangte fuihna thu a sawi.

Nimin, November 14 kha Children's Day (Naupangte Ni) a ni a, Mizoram hmun hrang hrangah hman niin, hmun ṭhenkhatah chuan minister leh MLA-te'n an hmanpui. Children's Day hi India prime minister hmasa ber Jawaharlal Nehru pian champha denchhena siam a ni.

Minister of state K Lalrinliana chuan Women & Child Development department (WCD) hnuaia Kolasib District Child Protection Unit (DCPU)-in Diakkawn YMA Hall-a hun an hman a hmanpui. Minister chuan, naupangte chu ram hma hun hriltu pawimawh tak an nih thu sawiin, "Isua pawh khawvela a chàm chhunga naupangte a ngaih pawimawhzia ngaituahin, tuna naupang chanhai te, kum tlinglo harsatna hrang hrang vanga buaina tâwk mekte venhim leh an dikna chanvo vawnsak hna hi a ropuiin a thawktute chu an fakawm hle a ni," a ti.

K Lalrinliana chuan, naupang kum tling lote'n nun kawng an zawh sual tur vèn chu hna pawimawh tak a ni tih sawiin, "Rual ú zawk, nu leh pa leh khawtlang hruaitute'n naupangte nun khalh ngil kawnga kan mawhphurhnate inzirtir thar a ṭul. Kawng engkimah naupangte thlahthlam lo tur leh an thil tihna hrang hrangah ngaihtuahna sênpuia telpui peih a pawimawh," a ti a; naupang chunga hleilenna chi hrang hrang do tlan a ngaih thu a sawi. Inkhawmah hian Children’s Day puala futsal leh essay inziahsiaka lawmmante sem a ni a; Enna In (Boy’s Home), Omega Centre leh Audrene Scism Children Home naupangte'n hun an hmang a ni.

Serchhipah chuan Sports Complex-ah District Legal Services Authority (DLSA) leh DCPU huaihawta hman niin, naupangte tan carnival buatsaih a ni a, bialtu MLA Lalduhoma'n a hmanpui a; hawnna inkhawm chu Serchhip district child protection officer (DCPO) Lalsiampuii Tochhawng-in a kaihruai. Lalduhoma chuan, naupangte chu pangpar kuhmûm ang an nih thu sawiin, "A sena rawn pár chhuak turte a vára lo pàrtir ṭãlh kan tum emaw, a vára rawn pár chhuak tur a sena lo pàrtir tum ṭãlh a dik lo a, an pianpui talent mila mawi taka partir chu puitling zawng zawng mawhphurhna a ni," a ti.

Naupangte chu nu leh pate'n nihtir tum sa nei ngawt lo a, an chemkalna hriatpui a ṭul thu sawiin Lalduhoma chuan, "An chemkalna kan hai chhuak ang a, chutah chuan kan hruai zawk tur a ni. Pa ber ni si, fate'n sakei hlauh taka an hlauh, khûr chunga an léng haw an nghah ṭhin kan la awm, chutiang naupang vanduaite venhim leh chhanchhuah chu sorkar, kohhran leh NGO-te'n kan batah i ngai ang u," a ti a; naupangte chu nun kawng pangngai leh tluang zawh tum turin a fuih.

Children's Day-ah hian naupangte chu intihhlimna chi hrang hrang neihpui an ni a; Khuallianin Children's Week puala intihsiakna hrang hranga lawmmante a sem a ni. Lungleiah chuan Convention Centre-ah DCPU, DLSA leh Samagra Shiksha-te huaihawtin hman a ni a, district bawrhsap K Lalrinzuali'n hmanpuiin, thupui chu 'Happy childhood' tih a ni.

Naupangte Ni hmannaah hian sorkar department hotu te, Child Welfare Committee leh Juvenile Justice Board member-te leh naupangte an tel a; Lunglei leh a chhehvela home leh sikul hrang hranga naupangte'n an thiamthilte an entir a ni.

Champhaiah chuan Kahrawt Field-ah DCPU leh DLSA huaihawtin Naupangte Ni hman a ni a, district bawrhsap SL Naveen chu khuallian niin, Naupangte Ni puala kawngzawh a vailiam. Kahrawt Field aṭanga Vengthlanga DK Traffic Point thleng kawng zawh a ni.

Darthangvunga Traffic Point-a hun hmanah kângmei ven chungchang leh faina kawnga hmalakna chungchang naupangte zirtir an ni a; DK Traffic Point-ah naupangte venhimna kawnga hriat tur pawimawhte sawi a ni bawk.

Lawngtlaiah chuan Naupangte Ni hi DCPU, DLSA leh World Vision India (Chhimtuipui Area Development Programme)-te huaihawtin Central YLA Hall-ah hman a ni a, Social Welfare department hnuaia Lawngtlai district 

programme officer Vanlalhruaii khuallian a ni. Inkhawm hi Region HSS lecturer C Lalṭanpuii'n a kaihruai a, DCPO Mary Lalremruati, Lawngtlai DCPU-a counsellor N Darchhingpuii leh DLSA legal aid counsel C Lalrinfela ten thu an sawi.

Children's Day hmannaah hian Lawng­tlaia sikul hrang hranga zirlaite leh sorkar department officer-te an tel a; Children's Week puala essay inziahsiak, milem in­ziahsiak leh thlalak intihsiaka ti ṭhate hnenah lawmman hlan a ni.

Mamitah chuan Chhimveng YMA Hall-ah hman a ni a, Mamit bialtu MLA H Lalzirliana, district bawrhsap Dr Lalrozama leh Mamit SP Shashank Jaiswal ten an hmanpui.

MLA H Lalzirliana chuan, tunlai ṭhalai zingah nun uluk loh vanga thih hun hmaa thi an tam tih sawiin, "Hei hi a chhan chu, nu leh pa leh kan zirtirtute thu kan awih loh vang a ni," a ti a; Mamit district chu Aspirational District ni mah se, chu chu a nihna reng tur a ni lo tih sawiin, tumruhna nen hma lam pan a ngaih thu a sawi.