KHAWTHLIR

Mizoram State Council for Child Welfare chuan nimin khan Chanmari YMA Hall-ah 'Child care' tih thupui hmang­in seminar an buatsaih a, Assembly deputy speaker Lalrinawma’n a hawng. Aizawla hmunpui nei kohhran pawl hrang hranga hmeichhe lam hruaitute leh pavalai aiawhte telin, mi 300 chuang an tel a; naupang enkawl chungchanga mawhphur hmasa bertu nu leh pate tih tur leh mawh­phurhnate inzirtir a ni.

MPC party ṭhalaite chuan thuchhuah siamin, Aizawl Municipal Corporation(AMC)-a sorkarna chelhtu MNF party-in kum 2015-a AMC inthlan dawna Aizawla free wifi pek an tiam chu tun thlengin awmze neia tihhlawhtlin a la nih loh thu an tarlang a, "Vawiin thlenga a rim a râ hriata hmuh tur a awm leh ta si lo hian AMC mayor Pu Lal­hmingthanga leh a hote an thutiama an din zawh lohzia a tilang chiang hle a ni," an ti.

Siaha District Research Officer's office chuan nimin khan DC Conference Hall-ah 'Annual training of Registrars of Births & Deaths, 2019-2020' an buatsaih. Siaha district-a khua/veng tina Registrar of Birth & Death-te tana buatsaih training hi district research officer PC Lalbiaktluanga'n a kaihruai a, Siaha assistant commissioner Amol Sri­vastava chu khuallian a ni.

Dr Benjamin Vanlalmawia Khiangte chuan tun hnai khan Kerala Institute of Medical Sciences aṭangin super specialist a zo. Super specialist a hmuhna hi pum lam - gas­troenterology a ni.

Kolasib-a eirawngbawlna gas (LPG) home delivery kalpui tur chu nimin khan Food, Civil Supplies & Consumer Affairs minister K Lalrinliana'n Ṭumpui Community Hall-ah a hawng. Gas home deli­very hi Kolasib-a kalpui 

ṭan tur niin, nimina hawn tak chu pilot project a ni.