MJA hruaitute'n Lunglei district-a Sorkar hmun leh hnathawhte an tlawh

Mizoram Journalist Association (MJA) Gen.Hqrs. hruaitute leh Lungleia MJA member-te chuan MJA president Zonunsanga Khiangte hoin Lunglei district-a sorkar department hrang hrang hmalaknate a hmunah kalin an enfiah.

MJA hruaitute leh member-te chuan November 13, Nilaini khan Mizorama hydel project hmasa ber dawttu, Khawiva Mini Hydel Project an tlawh a; Khawiva Sub-Station SDO Ng. Lalruatsanga leh a thawhpuiten lo dawngsawngin, an hmalakna leh hmachhawpte an lo hrilhfiah. He project hian kum 1988 aṭangin tun thlengin kawlphetha million unit 26.33 a siam chhuak tawh a ni.

Khawiva Project hi kum 1986-ah ṭan niin, kilowatt 350 siam chhuak thei a ni a, tun dinhmunah kum tin unit nuai 6-7 inkar siam chhuak ang a ni. Project hi hun eng emaw chen hluihlâwn a ni a, tun hnaia tuaithar leh a nih hnuah Power & Electricity department-ah thawktu indaih loh vangin Amazon Engineering, Vaivakawn hnenah kum 2010 khan hlan a ni a, anni hnen aṭangin sorkarin kawlphetha unit khat Rs. 1.05-in a lei leh ṭhin.

MJA-te chuan Nilaini vêk khan Agriculture department hmalakna an tlawh a; district agriculture officer Tlangtimawia Zote chuan, Lunglei High Po­wered Committee (HPC) kal­tlangin Agriculture, Industries leh AH&Vety department-te 

ṭangkawpin Green Revolution an kalpui mek thu a lo hrilh a ni.

MJA hruaitute hian nimin khan Lunglei Civil Hospital an tlawh a, medical superintendent Dr SR Ngurchamliana leh officer dangte'n lo dawngsawngin, damdawi-in dinhmun an lo hrilh. Lunglei Civil Hospital hi kum 1900-ah khum 20 hmangin bul ṭan a ni a, tunah hian khum 160 a awm mek. Doctor specialist 17, medical officer (MBBS) panga, medical officer (AYUSH) pathum leh dental surgeon pa­hnih an awm a; nursing superintendent pahnih, ward superintendent pathum, staff nurse regular 34 leh contract 27 awmin, technician, group D, office staff leh driver 70 chuang an awm bawk.