Court thupek nghak chhuak loa Báng turin MHIP hruaitute an phût

MHIP inthlana nomination chingpen duh lotu nia insawite chuan, nimin khan Aizawl Press Club-ah thuthar thehdarhtute an kâwm a; MHIP Ge­neral Headquarters office bearer zinga thubuai nei mekte chu Court-in thu­tlukna a puan nghak loa báng turin an phût.

Press conference neitute zinga mi Khawlrinpuii chuan, fatu awm loin ruai a ṭheh theih loh tih sawiin, "Dik lo taka MHIP inthlanna thil tite hi hnam, sakhua leh Mizo hmeichhiate zahawmna humhim nan kan do tlat dawn a, nihna duh leh beisei vanga hma la kan ni lo," a ti a; inthlannaa an chak loh vanga lungawi lo an ni lo niin a sawi.

Central YMA kaihhruainaa in­thlanna chu an zah thu leh inthlan result pawh lungawi taka an pawm thu sawiin Khawlrinpuii chuan, "Kan lung­awi lohna chu, April thlaa MHIP Gen. Hqrs  inthlanna tura seal leh nomination lem siam leh ballot paper tihchingpen chung­changa thubuai nei mekte'n hruaitu nihna an chelh hi a ni. Pawl thianghlim, hmeichhiate hmasawnna tura hma la ṭhintu MHIP kha a din leh theih nan dik lo taka thil titute hi báng rawh se," a ti.

Secret ballot tih­chingpen chung­changa FIR thehluttu Rohming­liani chuan, an ukilte remtihnain thil dik lo titute inpuanna an neih thu sawiin, "An inpuanna police statement aṭangin tuna President, Vice President, Assistant Secretary, Finance Secretary leh Executive Committee member pakhatte lakah IPC Section 120B, 468, 471 leh 473 hmangin chargesheet siam a ni," a ti a; forensic report aṭanga a lan danin, mi pathum an inhnamhnawih tih finfiah a nih thu a sawi.