Jan 1 - Nov 11 chhungin Lunglei dist-ah thubuai 185

Nimin khan Lunglei SP Conference Hall-ah Lunglei district Crime Review meeting neih a ni. He hunah hian, kumin January 1 aṭanga November 11 thlengin Lunglei district-ah thubuai 185 ziah luh a nih tawh thu an tarlang.

Crime review meeting hi session thumah ṭhenin, session hmasa ber chu Lunglei SP C Lalthanmawia'n a kaihruai a, Lunglei district-a dan bawhchhiatna thlen dante thlirhona leh sawizauna hun hman a ni. Session hnihnaah additional SP Lalchhuanthanga kaihhruaiin case chhui mek, la chhui zawh lohte sawiho a ni a; session thumnaah public prosecutor-te nen hnu chhuina leh misual hremna kawnga pawimawhte an sawiho bawk.

Meeting-a an tarlan danin, kumin January 1 aṭanga November 11 thleng khan Lunglei district-ah thubuai 185 ziah luh niin, chu'ng zinga 152 chu Court-ah chargesheet thehluh a ni tawh. Thubuai pariat chu chhui chhuah mai theih loh vanga khâr rih a ni a, thubuai chhui mek, la chhui zawh loh 25 a awm.

Thubuai zinga 23 chu pawimawh zuala ngaih a ni a; chu'ng zingah chuan - pawngsual thubuai pali, naupang khuaikhem thubuai pathum, tualthah tumna thubuai pathum, ruihhlo kaihhnawih pasarih, mi suam thubuai pakhat, chetsualna na tak pahnih, mi nunna laksak (tualthahna ni si lo) thubuai pathum a tel.

January 1 - November 11 chhungin Inner Line Permit (ILP) kaihhnawihah thubuai 11 ziah luh a ni a, mi 84 man a ni. Zu, damdawi leh ruihhlo dang Rs. 25,82,750 hû man a ni bawk. January 1 aṭanga October 31 inkarah lirthei ke pali nei 914, ke pathum nei 307 leh ke pahnih nei 798 man a ni a, pawisa chawitir tlingkhawm chu Rs. 6,39,000 a tling. Mi 16-te driving license chu titawp (cancel) turin DTO-ah thawn a ni.