National School Games Boxing thlen tur sawiho

Mizoramin November 19-22, 2019 chhunga 65th National School Games Boxing U-17 Boys a thlen tur sawihoin nimin khan School Education minister Lalchhandama Ralte hoin a pisaah Organising Committee an ṭhu a; committee péng hrang hrang hmalakna an thlirho.

Sorkar thuchhuah tarlan danin, National School Games Boxing-ah hian infiammi zirlai 400 leh official 71, an vaiin mi 471 an lo kal dawn a, R Dengṭhuama Indoor Stadium-ah nghah a ni ang a, mikhualte chu R Dengṭhuama Hall, Rajiv Gandhi Stadium leh Govt. Aizawl College commerce building sak tharahte thlentir an ni ang.

National Games hi November 19, 2019 chawhnu dar 2-ah hawn a ni ang a, November 22, Zirtawpni chawhnu dar 1-ah khâr tur a ni.