Ramri hrúlah COVID-19 awareness

Nimin khan Mamit District Level Task Force on Corona Virus (COVID-19) chu an chair­man Dr Lal­rozama, Mamit DC kaih­hruaiin DC conference hall-ah an ṭhut­khawm a; State Level Task Force on Mitigation of Corona Virus-in a phût angin national leh inter­national border bul hnai khaw tina awareness cam­paign neih dan tur an rél.

Meeting chuan, a ṭul anga vantlang inkhawm (gram sabha) ko turin Mamita Local Administration officer (DLAO) an ruat a, awareness campaign-a thuziakte mipui hnena hriattir turin Mamit Chief Medical Officer ruat a ni bawk. Awareness campaign hi February thla chhung ngeia ramri depa khaw tinah neih turin ruahmanna an siam a ni.

Ramri kâna lut/chhuakte'n COVID-19 an kai nge kai lo tih enfiahna turin Kanhmun Police checkgate-ah naktukaṭangin checkpost siam tur a ni a, medical team, police-te'n YMA phungbawmah sáwmin neih tum a ni. Endikna hmunah hian ram dang aṭanga lut reng rengte chu an hriselna dinhmun enfiah a nih dawn bakah, zawhna chhàn tur awm sa chhàntir tur a ni bawk.

COVID-19 kai hmuh chhuah an awm palha hmalak a awlsam zawk nan Mamit District Hospital-ah khum panga awmna Isolation Ward ruahman a ni a, School Education pisa kaltlangin COVID-19 laka him theih dan tur Mamit district-a sikul hrang hrangah zirtir tura ruahman a ni.