Mizoram mau lei duh tur company-te Aizawl leh Kolkata-a koh khawm rêl

Bamboo Development Board (BDB) chu nimin khan an vice chairman Dr K Pachhunga, MLA hoin a pisaah an ṭhukhawm a; mau leh rua hmanga hmasawnna chi hrang hrang awm mekte leh awm thei turte sawihoin, Mizorama mau awm sate awmze nei leh hlâwk zawka hralh leh sâwngbâwl a nih theih nan mau lei duh tur company-te Aizawl leh Kolkata-ah koh khawm an rél.

BDB meeting chuan, Hmunpui leh Lengpui khuaa Model Bamboo Plantation siam dan tur an sawiho a; Khawthlangtuipui leh Tlawng lui kaltlanga Bangladesh leh Cachar lama Mizoram mau tawlh ṭhin chu awmze nei zawka Mizoram sorkarin a kalpui dan tur sawihoin, "Kan hlâwkpui zawk theih nan Bangladesh leh ram chhunga mau lei ṭhinte (paper mill/company)-te nen hun remchang hmasa berah indawr ni se," an ti.

Mizorama mau hmanga thil siam chhuaktute'n skill development lamah ke an pên theih nan Industrial Development Board nena thawhho dan tur an sawiho a; kumin May thla aṭangin Mizorama thil siam chhuahte hlawk zawka hralh a nih theih nan ram dang (foreign) thiamna zir turin master trainer tirh dan turte an rél bawk.