SEDP atan nuai 75,000 an nei chungin cheng khat pawh an sem thei lo - MPCC

Mizoram Pradesh Congress Committee (MPCC) chuan thuchhuah siamin, MNF kaihhruai sorkarin budget-ah SEDP atan cheng nuai 75,000 an dah chungin, cheng khat pawh an sem thei lo tih an tarlang.

MPCC chuan, MNF sorkarin kum 2019-20 budget-ah SEDP kalpui nan cheng nuai 75,000 an dah tih sawiin, "Financial year a tàwp dawn ruai tawh a, financial year thar atana budget session neih a ni leh tawh chungin, Mizoramah SEDP ṭanpuina sum dawng pakhatmah an la awm lo," an ti.

MNF party-in kum 2018-a Assembly inthlan dáwnah chhungkaw tin hnena cheng nuai thum sem an intiam chungchangah MPCC chuan, MNF president Zoramthanga, chief minister ni mek chu chhungkaw tina cheng nuai thum sem tiamtu a nih thu leh, a tiam lai video pawh hmuh tur a la awm reng thu an sawi.

Congress party chuan, SEDP atana cheng nuai 75,000 dah chu Mizoram budget ngaihtuahin a tam hle tih sawiin, "Mizoram budget 2019-20 aṭangin 7% a ni," an ti a; sorkar department zinga SEDP atana sum dah aia budget nei tam chu - Finance, Home leh School Education department-te chiah an ni thu tarlangin, "PWD, Rural Development, P&E leh Health department-te budget ai pawhin SEDP-a sum dah a tam zawk a ni," an ti.

SEDP atan Mizoram budgetah cheng nuai 75,000 dah a ni chunga MNF-in an intiam anga cheng nuai thum an sem thei lo chu mak an tih thu sawiin MPCC chuan, "Chhungkaw pakhatah SEDP cheng nuai thum zelin sem ni se, budget-a an sum dah hian chhungkaw 25,000 a daih a, chhungkaw pakhat tê mahin an la dawng lo hi a mak tak zet a ni," an ti. Kum 2019-2020 financial year a tàwp tawh hnaih tawh avangin SEDP atana sum an dah nuai 75,000 chu an hmanna mipui hmaa sawifiah turin MNF an phût a ni.