Mi 15 hnenah state dang aṭanga vawk 1,750 lak luh phalna pe tawh
India ram state dang, Porcine Reproductive and Respiratory Syndrome (PRRS) leh African Swine Fever (ASF) lèn lohna aṭanga vawk leh a note lak luh Mizoram sorkarin October 24, 2019 aṭanga a phal hnuah nimin thleng khan state dang aṭangin Mizoramah vawk 1,750 lak luh phalna mi 15 pek a ni tawh.
Animal Husbandry & Veterinary secretary Lalthangpuia Sailo chuan, October 24, 2019-a thuchhuaha siamah, ram dang (foreign) aṭanga vawk lak luh chu khauh leh khawng taka khap a la ni zel a, India ram state dang, PRRS leh ASF lèn lohna hmun aṭang erawh chuan vawk lak luh phal a nih thu a tarlang a; vawk la lut turin AH&Vety Director remtihna lak hnuah Commerce & Industries Director aṭangin vawk lak luh phalna dil tur a ni.
Commerce & Industries department hotute'n Vanglaini palai an hrilh danin, October 24 aṭanga nimin thleng khan AH&Vety Director-in vawk lak luh a remtihsak mi 15 hnenah state dang aṭanga Mizorama vawk lak luh phalna pek a ni tawh. Mi 15-te vawk lak luh tum zat chu 1,750 a ni. Vawk lak luh phalna pek zingah vawk 10 chauh lak luh dil an awm laiin, vawk 500 lak luh dil an awm bawk.
AH&Vety department hotute chuan, India state zingah PRRS leh ASF a lèn an hriat loh thu sawiin, India ram state-te zingah vawk lak phal lohna state an neih loh thu an sawi a; India ram páwn aṭanga lakluh erawh khap tlat a la nih thu Vanglaini an hrilh.
Tarlan tawh angin, AH&Vety Secretary chuan, October 24, 2019 khan thuchhuah a siamah India ram chhung, PRRS leh ASF len lohna hmun aṭanga Mizorama vawk lak luh phal a nih thu a puang a; chutih laiin, October 29, 2019 khan Aizawl District Magistrate chuan Cr.PC Section 144 tlawhchhana thupek (order) chhuahin, District Magistrate phalna la hmasa lo chuan vawk, vawksa leh vawksa aṭanga thil siam reng reng district páwn lam aṭangin Aizawl district chhúnga lak luh khap a nih thu a puang thung.
AH&Vety Secretary thuchhuaha a lan danin, PRRS leh ASF lèn lohna state aṭanga vawk la lut turin Commerce & Industries Director-ah vawk lak luh phalna dil tur a ni a, chumi hmain AH&Vety Director remtihna lak phawt tur a ni. Vawk lakna/leina tur farm aṭangin registered vety practitioner siam proper soundness certificate neih tur a nih bakah, vawk lak luh turte chu AH&Vety checkgate-ah endik vek zel tur a ni. Vawk la luttute'n an lak luh zat leh lak luh ní ziakin AH&Vety Director-ah hriattir zel tur a ni bawk.
Chutih laiin, Aizawl District Magistrate thupek chu thla hnih chhung atan a ni a; ASF leh PRRS-te Aizawl district-ah a lèn hlauhthawnna avangin September 19, 2019-a AH&Vety department hriattirna lehkha bawhzuiin order chhuah a nih thu tarlan a ni.