Buhfai tichingpena puh DCSO hlui Kolasib Court-in thiam a chantir

Kolasib-a Supply kudama buhfai tam tham tak tichingpena puh PL Zohmingliana, Kolasib DSCO hlui chu Kolasib District Court-a chief judicial magistrate R Lalduhawmi chuan nimin khan thiam a chantir.

Kolasib chanchinbumite hnen aṭanga thu dawn danin, Kolasib Chief Judicial Magistrate hian PL Zohmingliana chu Kolasib kudama buhfai tihchingpen chungchangah finfiahna chi hrang hrang en a nih hnuah Court-in a thiam lohna a hmuh loh thu a puang a ni. Judgement order erawh chu kar leh lamah puan a ni dawn.

Tarlan tawh ṭhin angin, October 8, 2014 zan dar 7 velah Kolasib Supply kudam aṭangin 909 truck MZ-05 9591 hmanga buhfai phurh chhuah chu Kolasib leh Kawnpuia thuthar thehdarhtute'n ringhlelin an ûm zui a, truck chu Kawnpui daiah nangchingin, an man a, thuneitute hnenah an hlân a ni. Thuthar thehdarhtute chuan Kawnpui Police Station-ah FIR an thehlut nghal bawk.

Truck-in buhfai a phurh chu chutih laia Kolasib DCSO PL Zohmingliana ta a nih thu, a phurtu truck khalhtuin a sawi avangin PL Zohmingliana chu thubuai siamsak a ni a; Mizoram sorkar pawhin PL Zohmingliana chu a suspend nghal bakah, a hnu deuhah a hna aṭangin a bân zui a ni.

PL Zohmingliana man a nih hnu lawkah Kolasib Supply kudam aṭang vekin dan loin buhfai bag 100 dang hralh tura lâk chhuah a ni leh a, chu pawh chu Kolasib MJA-te'n an chhui zui hnuah, a mawhphurtu bera puh DCSO office-a LDC thawk lai FT Lallawmzuala lakah October 16, 2014 khan FIR thehluh a ni ve leh bawk.

FT Lallawmzuala chungchang pawh hi kum li chuang ngaihtuah a nih hnuah finfiahna mumal a awm lo-ah ngaiin Kolasib CJM Court chuan nimin vek khan thiam chantir a nih thu a puang a ni.