CM-in Hnahthiala sorkar hmun a enfiah

Chief minister Zoramthanga chuan nimin khan Hnahthial district headquarters-a DC pisa leh sorkar office dangte awmna tur hmunhma a enfiah. CM chuan, Hnahthial district chu district ṭha leh entawntlak a nih ngei theih nan theihtawpa sorkar thawhpui turin mipui a sáwm.

Vantlang inkhawmah Zoramthanga chuan, district inrêlbàwlna changtlung zawk din a nih theih nan DC office leh sorkar department dang pisa awmna tur ruahman a, hmasawnna ruangám siampui tura kal a nih thu a sawi a, "Ei leh bara intodelhna tur leh chhungkaw tin sum lak luh a pun theih nan SEDP kaltlangin hmalak a ni dawn a, a hlawhtlinna tur chuan Zoramin malsawmna a dawn, a chhunga chengte châwm zo thei ram zau tak, engkim ṭhat duhna hmun, ruahtui tamna kan neih hi hman ṭangkai thiam a pawimawh," a ti.

Chief Minister chuan, kawng siam hna thawh mek a nih thu te, zirtirtu ṭhahnem tak hun lak a nih tawh thu te, chhung tin damlo inenkawlna kum khatah cheng nuai hnih chin sorkarin a pek sak theihna tur Health Care Scheme siam a nih thu te, SEDP-ah board hrang hrang din a nih tawh thute a sawi bawk.

CM Zoramthanga hi minister Dr R Lalthangliana, Lunglei High Powered Committee vice chairman Lawmawma Tochhawng leh sorkar official dangte'n an ṭawiawm a ni. Minister Dr R Lalthangliana pawhin thu sawiin, Hnahthial district thar atan Master Plan duan a nih tawh thu a sawi a, "Hmasawnna tam tak a awm chho zel dawn a, inkalpawhna kawng ṭha zawk buatsaih tura hmalak mek a ni," a ti a; Hnahthial district-ah JNV school leh AYUSH Hospital neih theih beisei a nih thu te, district thar pathumah hospital changtlung tak ruahman a nih thute a sawi.

Chief Minister hian Hnahthial KVK, ITC, BDO office, damdawi-in leh DC pisate a tlawh a, sorkar hmunhma tihhmasawn zel dan tur a enfiah a ni.