KHAWTHLIR

Mizoram Legislative Assembly session chu November 19-21, 2019 chhung khian neih tur a ni. Session tur avang hian Aizawl district Sub-Divisional Magistrate chuan thupek chhuahin, session neih chhung, November 19-21 chhungin Aizawl Dâkinpui leh Raj Bhavan chhim lam gate inkarah mi panga aia tam punkhawm khap a nih thu a puang. Thupek hian dan leh thupek kengkawhtute a huam lo thung.

The Leprosy Mission (TLM), Mizoram chuan nizan aṭang khan Ramhlun North-a Baptist Kohhran biak-inah inkhawmpui an hmang ṭan a, zaninah a ṭiak ang. Inkhawmpuiah hian thupui chu 'I puanin hmun chu zauh rawh' tih a ni a; Upa C Vansiama, Rev. TC Zodinsanga, Rev. B Ropianga leh Rev. C Biakmawia te speaker an ni. TLM, Mizoramah hian kohhran pawl hrang hranga mite an tel a, president chu Rev.Dr Vanlalchhuanawma a ni.

JJ Act zirho CASA leh CodNerc 

chuan November 14, Ningani khan Sialsuk High School-ah naupang kaihhnawih dan, Juvenile Justice Act, 2015 chung­chang inhrilhfiahna hun an buatsaih a, Aizawl South-III bialtu MLA Prof. F Lalnunmawia'n a hmanpui. He hunah hian Sialsuk leh Samlukhai aṭangin zirtirtu leh zirlai ṭhahnem tak an tel a, social worker Vanramchhuangi (Ruatfela Nu) chu resource person a ni.

Pachhunga University College (PUC)-a Mizo department chuan nimin khan PUC Seminar Hall-ah Mafaa Hauhnar (H Lalrinfela) pual­in national seminar an buatsaih a, MLA Dr ZR Thiamsanga'n a hawng. 'Resuscitating Mafaa Hauhnar: Contemporary Perspective on his Essays and Poetry' seminar-ah hian Mizoram chhung leh páwn aṭangin mi 22-te paper buatsaih zirho a ni a, seminar pual­in Mafaa thuam leh thil chi hrang hrang phochhuah a ni bawk.

Deputy chief minister Tawnluia chuan nimin khan Ramthar North Multipurpose Centre a hawng. Centre hi cheng nuai 184.94 séngin UDPA department hnuaiah contractor R Liantluanga, Bungkawn, Aizawl sak a ni a, September 27, 2017-a sak ṭan, October 1, 2019-a sak zawh a ni.