Saitualah Discover North East hmang

Sorkar laipuia Ministry of Culture hnuaia North Eastern Zone Cultural Centre (NEZCC) leh Mizoram Art & Culture department chuan nimin khan Saitual khelmualah 'Discover North East' khârna hun an buatsaih a, Art & Culture minister R Lalzirliana leh NEZCC director Jitul Sonowal ten an hmanpui.

Minister R Lalzirliana chuan, India ramah hnam hrang hrangte'n an hnam nunphung leh tih dante an hloh nasa tih sawiin, chuvang chuan India sorkarin hnam tinte'n culture leh tradition an chawisan leh theihna turin nasa takin hma a la tih a sawi a, "Mizoram sorkar pawhin kan ram chhunga hnam péng hrang hrang culture leh tradition-te humhalha chawi nun zel nan hma lain, hnam dangte nen inunauna ṭha tak neih kan tum a ni," a ti.

Discover North East khârna inkhawm hi Saitual DC C Lalpeksanga'n a kaihruai a, programme coordinator F Lalthanmawia'n report a pe a; NEZCC director Jitul Sonowal pawhin thu a sawi. Discover North East-ah hian Mizoram páwn aṭangin cultural troupe pali an tel a; Madhya Pradesh aṭangin Badhai Cultural Troupe leh Karma Cultural Troupe, Manipur Cultural Troupe leh Meghalaya Cultural Troupe-te an ni.

He programme-ah hian November 13 khan Tualbung khuaah hun hman a ni a, November 14 khan Mualpheng khuaah hman leh a nih hnuah, nimin khan Saitualah a tàwpna leh khàrna hun an hmang a ni.