Rs. 3,00,000 an sem theih loh aiah State Games an siam - ZPM Media Chairman

ZPM chuan nimin khan an party pisaah inkhawm an buatsaih a, ZPM Media Cell chairman PC Vanlal­ruata chuan thu sawiin, MNF kaihhruai Mizoram sorkarin an flagship programme SEDP aṭangin Rs. 3,00,000 an sem theih dawn loh avangin, a aiah constituency 40-te intihsiakna tur Mizoram State Games an siam dawn niin a sawi.

PC Vanlalruata chuan, Mizoram State Games buatsaih chu ṭhalaite tan thil lawmawm tak a nih rualin, inbuatsaihna hun a tlem lutuk chu lung­chhiatthlak a tih thu a sawi a, "MLA zawng zawng, ruling leh opposition-te an mangang hle. Constituency tinah MLA-te chairman-ah an hmang a, mahse, state pum huap committee an la ko thei bawk si lo, an lu a hai hle a ni. State Games kalpui tum dan thlir hian, infiammite leh infiamna chawisan tumna aiin, cheng nuai thum an sem theih loh hliahkhuh nan hnawhsarum takin an buatsaih a ang ta ber a ni," a ti.

Mizoram sorkar chu kal ngaihna hre lo-ah puhin PC Vanlalruata chuan, "Tunah hian sor­kar buatsaihin Páwl Kût hman mek a ni a, inti-Mizo hnam party hle si hian Mizo hnam kût hman hun pawh an hre lo. Sa­hmulphah thla kan hmang mek a, buh seng mek lai, páwl tlak hmain Páwl Kût min hmanpui ta ringawt mai a ni," a ti a, January thlaa Chapchar Kût hman ang vel a nih thu a sawi.

ZPM Media Chairman chuan, hun kal tawhah sorkar buatsaihin Páwl Kût hman a ni tawh ṭhin tih sawiin, chuti chung chuan Social Welfare department website-ah chuan, 'A vawi khatna atan Pawl Kut hman a ni' tia tarlan a nih thu a sawi a, "Sorkar hmasa thil lo tih tawh engahmah ngaih lohna leh palzûtna lian tak a ni," a ti.