Mamitah Youth Empowerment Programme
Mamit District Child Protection Unit (DCPU) leh Mamit Officer’s Club chuan nimin khan Children’s Week khârna atan Youth Empowerment Programme (YEP) an buatsaih a, Mamit bialtu MLA H Lalzirliana'n a hmanpui.
H Lalzirliana chuan, Mamita zirlaite chu khawpui danga zirlaite aia an hniam bik loh thu sawiin, "Mamit district chhungah mi tam takin hlawhtlinna an nei tawh. Theih loh tih thumal thaichhia a, thinlung huaisenna nei, mahnia harsatna hneh ṭhinte'n hlawhtlinna an chang ṭhin. Taimakna leh tumruhna nen, chhel taka lehkha zirin in hma hun thlir chungin ke pên ang che u," tiin zirlaite a fuih.
District Legal Services Authority secretary Gracy L Bawitlung, David Zohmangaiha (Everester), boxer NT Lalbiakkima leh Mamit College-a assistant professor Dr Joseph Lalremruata ten zirlaite fuihna thu an sawi a; zirlai lama mi hlawhtling tak tak - TATA Institute of Fundamental Research, Mumbai-a post doctoral researcher Dr Rebecca Lalnuntluangi leh IIT-Mumbai-a post doctoral research scientist Dr Krista Roluahpuia ten fuihna thu video-a an thawnte entir a ni bawk.
Youth Empowerment Programme-ah hian Mamita high school leh higher secondary school zirlai 400 chuang an tel a, mithiam eng emaw zatin fuihna thu an sawi. District Level Child Welfare-in 'Women empowerment in Mizoram' tih thupui hmanga Children's Day puala essay inziahsiak an buatsaih lawmman sem a ni.