Kum 2019-ah mi 21,567-in sahuan tlawh

Aizawl Zoological Park (Aizawl Sahuan) chu kum 2019 chhung khan mi 21,567-in an tlawh a; sorkar kum kal mek April-December chhungin Sahuan tlawhtute aṭangin Rs. 38,26,300 hmuh a ni.

Aizawl Sahuanah hian ramsa 197 a awm a, ramsa chi hrang (species) 29 a ni. Kum 2019 chhunga ramsate ei tur lei nan Rs. 38,15,995 hman a ni a, thawktute hlawh leh Sahuan tihchangtlun nan Rs. 1,46,66,028 hman a ni bawk. Kum khata sahuan enkawlna atana sum sên zawng zawng chu Rs. 1,84,82,023 a tling.

Aizawl Zoological Park hi hectare 65-a zau a ni a; kum 2019 chhunga Sahuan tlawhtu mi 21,567 zinga 5,663 chu naupang kum 10 hnuai lam niin, mi 15,904 chu kum 10 chung lam an ni. Sahuan tlawhtu zingah tawhsual tâwk an awm hriat a ni lo a, dan loa Sahuan chhunga ramsate kutthlak an awm hriat a ni lo bawk.

Deputy conservator of forest C Lalbiaka, Wildlife Division hnen aṭanga thu dawn danin, Aizawl Sahuan tihhmasawn tumna hrang hrang a awm mek a, tihlen tumna erawh a awm rih lo. Sahuan chhunga ramsa thi an awmin an thih chhante hriat nan postmortem ṭhin a ni a, chumi hnuah phûm emaw, hâl ral emaw ṭhin a ni.