LSC-a hming thlak leh mi dang hlan ṭan theih hun tihtlem a ni

Land Revenue & Settlement (LRS) department chuan thuchhuah siamin, LSC thlak chungchang an sawifiah a; sorkarin ram a pek kum (allotment year of house site) aṭanga teha kum 5 hnuah ram neitute hming inthlak (lei leh hralh, inhlan chhâwn) tih theih a nih tawh thu an tarlang.

LRS department chuan, sorkarin mimal hnena chenna in hmun atana ram a pek chu, sorkarin a pek kum aṭanga kum 10 a tlin loh chuan hming thlak, mi hnena pek leh hlante tih theih a ni lo ṭhin tih sawiin, "Mizoram Land Revenue Act, 2013 siam danglam a ni a, Mizoram Land Revenue Act, 2013 Section 36(4)-in a sawi angin, sorkarin ram a pek kum aṭanga teha kum 5 hnuah ram neitute hming inthlak (lei leh hralh, inhlan chhâwn) tih theih tawh a ni," a ti.

Hetih lai hian, a hnuaia mi angte hi ram inhlan chhâwn, neitu hming thlak chungchanga khuahkhirhnain a huam lo thung.

1. Chhungkaw khata chengho, ei leh in inbáwl hrang lo.(Pi leh pu, nupui/pasal, tu leh fa, dan anga fa lâkte huamin)

2.    Inrochun emaw, court order emaw hmanga hmingthlakna tur a nihin.

3.    Loan lâkna tura LSC hming thlak a ngaihin.

4.    Land Acquisition Act hnuaia ram lâk emaw, sorkar rorelna anga ram lak a ngaihin.

5.    Sakhua/kohhran pawl (religious institution) emaw, hlâwkna nei loa vantlang tana pawl din hnenah vantlang hamṭhatna tur thilah.