BJP sorkarah MNF party an innghat - MPCC Media Chairman

Nimina Congress Bhavan-a Congress party-in political session an neihah MPCC Media chairman Lallianchhunga'n thu a sawi a, MNF party innghahna ber chu central-a BJP sorkar chak leh chak lohah a nih thu a sawi.

Lallianchhunga chuan, MNF party chu BJP sorkar chak leh chak lohah an innghat hle nia sawiin, "BJP din­hmunin a ni tèlin tlakhniam lam a pan zel avangin MNF innghahna a nghîng mek a ni. BJP sorkarah India ram economy dinhmun a ṭha lo hle a, unemployment rate pawhin kum 45 chhunga a tawn san lai ber (chhiat lai ber) a thleng mek; hna thawk thei ṭhalai tam tak tan hna thawh tur a awm lo," a ti.

Centre for Monitoring Indian Economy (CMIE) tarlan danin, kumin chhung­ah October 2019 kha unemployment rate san ber thla a nih thu sawiin Lal­lianchhunga chuan, "India ram economy dinhmunin hniam lam a pan zel. Centre for Sustainable Employment (CSE) mi thiamte tarlan danin, kumin chhung ringawtah pawh mi nuai 90-in hna an chán hial a ni," a ti a; prime minister Modi-a'n kum tin hna thar nuai 100 siam a tiam chu an hlen lo hle niin a sawi.

MPCC Media Chairman chuan, Goods and Services Tax (GST) aṭangin beisei ang chhiah an hmuh theih loh avang leh India ram economy dinhmun a tlakhniam zel avangin 15th Finance Commission hun pawhsei an tum tih a sawi a; National Crime Report Bureau (NCRB) report 2016 chu an upbeh reng hnuah November 8, 2019-ah an tihchhuah chauh thu te, NCRB-ah tarlan danin, kum 2016 chhungin loneitu mi 11,379 an intihhlum thute a sawi bawk.