Power supply pe ṭha turin ngen

Mizo Zirlai Pawl (MZP) chuan thuchhuah siamin, High School Leaving Certificate (HSLC) leh Higher Secondary School Leaving Certificate (HSSLC) exam ṭan a ni dawn tih an tarlang a, zirlaite'n ṭha tak leh tluang taka exam an hmachhawn theih nan exam chhungin power supply hnianghnâr taka pe turin sorkar an ngen.

MZP chuan, zirlaite lehkha zir tibahlah thei zawnga ri bengchheng siam lo tur leh harsatna siam lo turin mi tin an ngen a; exam tur zirlaite chu ṭhahnemngai taka zir a, ram leh hnam nghahfâk an ni tih hre chunga exam hmachhawn tura chahin, duhsakna an hlân a ni.

MZP chuan, nimin khan Mizoram Scholarship Board (MSB) hotute kâwmin, Mizo­ram Cooperative Apex Bank kaltlanga zirlaite account-a scholarship thun dan an sawiho a; "Tunah hian post matric scholarship pek mek a ni a, tun kar chhung hian pre matric pawh pek vek hman a nih tur thu MSB hotute'n an sawi," an ti.