Governor thu sawiah MNF chhungkaw boruak chhia a langah MPCC-in an ngai

Mizoram Pradesh Congress Committee (MPCC) chuan, MNF party chhunga hruaitu nih inchuhna boruak kal zelah MNF vice president hlui leh  Cabinet minister Dr R Lalthangliana beng hniam tumna a la lian hlea an ngaih thu leh, MNF chhungkaw boruak ṭha lo chu Republic Day-a Governor thusawi aṭangin a lan theih thu an tarlang.

MPCC chuan thuchhuah siamin, kumin Republic Day lawmna, Lammuala neiha Governor PS Sreedharan Pillai thusawiah, tun hnaia Mizoram tana chanchin lawmawm Mizoram University Southern Campus hawn tur chungchang leh Health Care Scheme kalpui chungchanga sorkar leh private hospital-te inremna chungchang a lang lo tih an tarlang a; heng thil pahnihte hi Dr R Lalthangliana enkawl department kaihhnawih ve ve a nih thu an sawi.

Chutih laiin, a changtu Horticulture department-in an hriatpui loh, SEDP hnuaia rua chîn tum chungchang leh chumi atana hmalaknate Governor thusawiah a lang a, Tourism lama sorkar hmalaknate phei chu uar taka tarlan a nih thu, Congress party chuan an tarlang.

MPCC chuan, Republic Day-a Governor thusawi tur chu sorkar thuneitute'n state sorkar hnathawh an ngaih pawimawh zawng an tarlanna a nih ṭhin thu sawiin, "Tun hnaia Health department leh HTE department kaihhnawiha thil thleng liante tarlan a ni lo hi a mak a, sorkarin a ngaihlu teh chiam lo tih a lantir. MNF hruaitu nih inchuhna boruak kal zelah Dr R Lalthangliana beng hniam tumna a la lian hle tih he thil hian a lantir chiang hleah kan ngai. MNF chhungkaw boruak ṭha lo Republic Day-a Governor thusawi thlenga a lang chhuak hi a pawi hle a ni," an ti.