KHAWTHLIR

Zoram People’s Movement (ZPM) party Political Affairs Committee chu nimin khan an pisaah an ṭhukhawm a, kumina Mizoram puma village council leh Aizawla local council inthlan awm turah party dang thawhpui loin, ZPM party hminga a mala din ni se, an ti. He an thutlukna hi ZPM block, group leh unit-te an hriattir a, thutlukna anga VC leh LC inthlan hmachhawn tura inbuatsaih turin an ngen a ni.

Zirtiri Residential Science College NSS leh Red Ribbon Club-te chuan nimin khan an college-ah blood donation camp an huaihawt a, Aizawl Civil Hospital tan mipa 103 leh hmeichhia 31-te'n thisen unit 134 an pe. Nimin vek khan

Saiha College NSS unit chuan Saiha District Hospital tan thisen unit 31 an pe a, a petute mipa 23 leh hmeichhia pariat an ni.

Nimin chawhma dar 10:30 vel khan Serchhip district-a Keiṭum khuaa Biakkunga in, Assam type chu a kâng a, bungrua chuh hman lohin a kâng ral. Thu dawn danin, kângmei chhuah chhan hriat chian a ni lo a, a kan ṭan laiin in chhungah awm an awm lo a, in hnuaiah erawh chuan Biakkunga fanuin puan a tah a ni. Nimin vêk khan Keiṭum khaw­tlangin in kâng senghawi hna an thawk a, kângmei tuarte chhawmdawl hna an thawk nghal a ni.

Durtlanga Women Polytechnic-a National Service Scheme (NSS) unit chuan nimin khan Bawngkawna Brigade Field chhung leh a chheh­vel thenfai hna­tlangpui an huaihawt a, zirlai ṭhahnem tak an thawk  chhuak a ni.

IPR secretary Sangdingliana chuan nimin khan Serchhip Press Club sak mek a tlawh. Serchhip MJA member-te'n hna thawh tawh dan leh hmabak la awmte an lo hrilh a, hna thawh chhunzawm thuai a nih theih nan kawng dapsak turin an ngen a; Sangdingliana pawhin a theih ang anga hmalak a inhuam thu a hrilh. Serchhip Press Club sak hna hi CM Special Fund sum Rs. 10,00,000 hmanga bul ṭan a ni.