CM leh NCW member an inkâwm

National Com­mission for Women (NCW) member Soso Shaiza chuan November 16, Inrinni khan chief minister Zoramthanga a pisaah a kâwm a, Mizorama hmeichhe dinhmun chawisanna tura hmalak theihnate an sawi dûn.

Soso Shaiza chuan, National Commission for Women aiawhin Mizoram, a bikin aspirational district (Mamit district) chhunga hmeichhiate dinhmun zir chianga Mizoram tlawh a nih thu a sawi a; Mamit district tihmasawn tura sorkar hmalaknate chu fakawm a tih thu Chief Minister chu a hrilh.

Hmalak belh zel theihna tura schools of excellence din leh working women hostel siamte ṭha a tih thu sawiin NCW Member chuan, "NCW kaltlangin awareness programme leh research buatsaih theih a ni. Ram inrêlbàwlnaah hmeichhia tel ve chungchang leh police lama hmeichhia tam zawk an luh theih kan duh a ni," a ti.

Chief Minister leh Soso Shaiza hian handloom chawisan pawimawhnate leh entrepreneurship kaltlanga hmeichhe dinhmun ṭha lote tihhmasawn a pawi­mawh­ziate an sawi dun bawk. NCW member Soso Shaiza hi Mizoram State Commission for Women chairperson Lallawmchhungi leh member Prof. Lalneihzovi ten an ṭawiawm a ni.