Puducherry Tourism Director-in nature tourism-ah Mizoram a hlawhtlin theih a ring

Puducherry sorkara Tourism director L Mohamed Mansor chuan, Mizoram chu leilung mawina (nature) hmanga khualzin hîp luh kawngah a hlawhtlin theih a rin thu a sawi. Puducherry hi khualzin aṭanga kum khat chhunga cheng vbc. 400-500 vel hmu thei a ni.

Tun hnaia Mizoram sorkar tirha Puducherry tlawhtu MJA member pakua leh Information & Public Relation (IPR) official pathumte nen an inkawmnaah Mohamed Mansor chuan, nature tourism lamah Mizoram a hlawhtlin theih a rin thu sawiin, "Mizoram chuan hmun mawi tak tak in nei a, hemi hmang hian khualzin in hip theiin ka ring," a ti.

L Mohamed Mansor chuan, leilung leh thing leh maute tichhe záwnga khualzin híp tura hmunhma buatsaih an duh lo tih sawiin, "Environment tichhe zawnga khualzin hîp chu a hlâwk loah kan ngai," a ti a; environment humhalh chunga khualzin hîp dan an zawn ṭhin thu a sawi.

Puducherry Tourism Director sawi danin, Puducherry sorkar chuan tourist hîp luhna atan thil pali - rinna lam, tuifinriat kam (beach), sumdawnna hmun (market) leh biak-in an hmang ber a; tunah hian beach pathum an buatsaih leh mek a ni.

Sorkarin khualzin hîp luhna tur hmunhmáte a siam a, a peih hnuah mimal kutah a hlan ṭhin a, privatisation an uar hle. Khualzin hìp luhna tura hma la an awm chuan mimal pawh ni se, sorkar aṭangin puihna an pe ṭhin.

Zawhna chhangin Puducherry Tourism official-te chuan, khualzinte aṭanga kum khata an sum lak luh zat chiah an chhût theih loh thu an sawi a, "Privatisation kan kalpui nasat avangin mimal sum lak luh zat chiah hriat a har. Kum khatah cheng vbc. 400-500 vel kan la lut ṭhin angin kan chhût. Kum khatah ram chhung aṭangin mi nuai 50 vel leh ram pawn aṭangin mi nuai 1.5 vel khualzin an lo kal ṭhin," an ti.

Tourism official-te chuan, kum khatah budget cheng vbc. 50 vel an neih thu sawiin, "Khualzin híp tur hian ṭan kan la nasa a, ram chhung leh páwna festival-ahte telin, khualzin híp thei tura kan thil neihte uar takin kan pho chhuak ṭhin. Internet kaltlang pawhin ṭan kan la nasa hle," an ti a; tun dinhmunah Puducherry-ah star hotel 27 leh hotel dang 300 vel a awm thu an sawi.