Education reforms kalpui tum a ni - Education Minister

School Education minister Lalchhandama Ralte chuan November 15, 2019 khan cheng nuai 974 sénga sak Education Centre, Treasury Square-a mi a hawng a, education reforms kalpui tum mek a nih thu a sawi.

Minister Lalchhan­dama Ralte chuan zirna atana Mizoram sorkar hmalakna sawiin, "Human Resources Development Board hmangin education reform sorkarin kalpui a tum mek. Kum khat tling loah hna 1,000 chuang lak a ni tawh. Hindi teacher thar lakna tur central aṭangin phalna kan dawng a, tuna phalna kan hmuh hian March 2020 thleng chauh hlawh a huam. A hnu lama central sorkarin kalpui zel a tum dante kan zawtfiah mek a ni," a ti. 

Mizorama sorkar department lian ber, thawktu tamna ber enkawlna tur directorate building thar hawn a ni chu lawmawm a tih thu sawiin Lalchhandama Ralte chuan, "Building sak a nih theihna atana bultumtu leh thawktu zawng zawng chungah lawmthu ka sawi a ni," a ti a; building thara thawktute chu biak nuam leh mi dangte ṭanpuitu ni turin a chah.

Education Centre hi chhawng sarih a ni a, motor parking LMV 30 leh two wheeler 40 dah theihna a awm a, a chung berah conference hall a awm. In hi School Education Directorate building atan hman a ni ang.