KHAWTHLIR

November 16, Inrinni khan Kulikawn Bial KṬP-te'n blood donation camp an huaihawt a, mipa 52 leh hmei­chhia pariatte'n Aizawl Civil Hospital tan thisen unit 60 an pe. Aizawla Zotlang Branch KṬP pawhin Synod Hospital tan thisen unit 23 an pe a, a petute mipa 17 leh hmeichhia paruk an ni. Champhai Vengsang Bial KṬP chuan Champhai District Hospital-ah thisen unit 21 an pe a, petute mipa 17 leh hmeichhia pali an ni a; Aibawk Bial PYD pawhin State Referral Hospital-ah thisen unit 15 pein, a petute mipa 13 leh hmeichhia pahnih an ni.

Nimin Pathianni khan Mizoram Baptist Koh­hranah chuan 'Naupangte Ni' hman a ni a, he ni pual hian BCM-a tual­chhung kohhrante'n nimin chawhma in­khawmah an remchan angin hun an hmang a, thupui chu 'Naupang chu a kalna âwm kawngah chuan zirtir ula' (Thufingte 22:6) tih a ni. Thupui hmangin Pathian thuchah ngaihthlak a nih bakah, nau­pangte'n thil chi hrang hrang an entir a ni.

The Leprosy Mission, Mizoramin November 15, Zirtawpni zan aṭanga BCM biak-in, Ramhlun North-a inkhawmpui an hman chu nizan khan a ṭiak. He inkhawmpuiah hian thupui 'I puanin hmun chu zauh rawh' tih chu speaker pali - Upa C Vansiama, Rev. TC Zodinsanga, Rev. B Ropianga leh Rev. C Biakmawia ten an sawi a; zaipawl hrang hrang an zai bawk.

Saitual DC pisaa confe­rence room leh hall thar chu November 15, Zirtawpni khan bialtu MLA R Lalzirliana, Power & Electricity minister-in a hawng. R Lalzirliana chuan, district tharah vawi leh khatah thil 

zawng zawng neih a harsat thu a sawi a, district dang neih ang zawng zawng vawi leh khata neih ve nghal tum lo turin mipui a chah.

Dr Zorammawia (59) s/o Thanseia (L), Zarkawt, Health department-a joint director (Dental),  Mizo ha doctor zinga MDS hmasa ber ni bawk chu nimin zing khan lungphu châwlin a thi a, nimin vêk khan vui a ni.