Chalfilh Vanzau-ah NE Riders Meet

Aizawl Thunders chuan November 26-28, 2019 chhungin Chalfilh (Vanzau)-ah 11th North East Riders Meet 2019 (NERM) an thleng dawn. Hemi chung­chang hi Aizawl Thunders hruai­tute chuan November 16, Inrinni khan Aizawl Press Club-ah thuthar thehdarhtute an hrilhfiah.

NERM in-charge secretary TBC Lalniliana chuan, NERM 2019 chu Mizoramin ṭum hnih a thlenna tur a nih thu sawiin, "Kum 2013 khan Champhaiah Aizawl Thunder-in kan lo thleng tawh. Tun ṭum meet-ah hian bullet rider 2,000 vel hmarchhak state pasarih bakah central India, Nepal, Bhutan, USA leh Europe aṭangtein an fuan khawm dawn a, Mizo mipuite'n hmun hrang hrang aṭanga lo kal turte hi zâwldawh leh mawi takin i lo mikhual ang u," a ti.

TBC Lalniliana chuan, Vairengte aṭanga Chalfilh thleng bullet-a tlân tur an nih dawn thu sawiin, "Kawng lakah harsatna hrang hrang an nei a nih pawhin, kan Mizote miziaa a ṭhalai - tlawmngaihna, ngilneihna, dawhtheihnate an chungah i lo lantir ang u," a ti a; rider-te chu ze inang lo tak tak tak an nih dawn avangin hriatthiamna nena lo dawnsawn a ṭul thu a sawi.

NERM-ah hian registration ti lo tan chhim a rem loh tur thu sawiin Lalniliana chuan, "Registration hi Rs. 5,500 leh Rs 6,000-in tih a ni a, mahse, hemi hun hi chu kan khâr tawh. Registration nei lo, kal ve duh si tan a hmunah Rs. 10,000-in registration a tih theih ang. Venhimna khauh taka tih a ni dawn," a ti.

NERM thleng tura an inbuatsaihnaah Chief Minister, bialtu MLA leh minister dangte'n an phûrpui a, a panna kawng siamṭhat a nih avang leh Mizoram sorkarin sum eng emaw zat a ruahmansak avangin an lawm thu an sawi a; Chalfilh Group YMA, Khanpui leh Buhban khawtlangin an buaipuinaah an lawm thu an sawi bawk.

NERM atan hian budget Rs. 94,40,000 an siam a, tent camp tura ruahman a ni. Mizo hnam lâm leh infiamna te, band leh zai chi hrang hrang a awm dawn a; Khanpui leh East Phaileng khuaah charity ride an nei bawk dawn a ni.