Robert Romawia'n central hotute a kâwm
Sports & Youth Services (SYS) minister Robert Romawia Royte chu November 15, 2019 khan New Delhi-a All India Sports Ministers Conference-ah a tel a; sorkar laipuia ministry hrang hrang hotute a dawr kual nghal.
Sorkar thuchhuah tarlan danin, Robert Romawia hian Sports Minister Conference-ah hian, ram pum huap atan leh Mizoram bik tana infiamna lam tihhmasawnna tur rawtna eng emaw zat a sawi a; Sports ministry-in Mizoram tan football field pahnih leh hockey field pakhat siamna tur a pek thar avanga a lawm thu a sawi a ni.
SYS Minister hian Union Sports minister Kiren Rijiju a kâwm a, Mizoram sorkarin infiamna tihhmasawnna tura hma a lak mekna leh puih an ngaihnate a hrilh. Robert Romawia’n a rawt angin Kiren Rijiju chuan, India hmarchhak state-a sports minister zawng zawngte'n Tokyo Olympics 2020 an chhim theih dan tur ruahman a nih tur thu a sawi.
Robert Romawia Royte chuan Union Tourism minister Pahlab Singh Patel pawh a kâwm a, Mizoram sorkarin DPR a thehluh tawhte phalsak thuai turin a ngen. Mizoram tlawh vat tur leh Thenzawl Golf Course hawng turin a sáwm a; Pahlab Singh Patel chuan, remchan lohna dang a awm loh chuan December thla tìrah Golf Course hawng turin Mizoram tlawh a tum thu a lo hrilh.
Tourism minister ni bawk Romawia Royte kutah Reiek Tourism Project Phase-I sanction-na meeting minute Ministry of DoNER hotute'n an hlan. Mizoram State Games 2019 atan Mizoram sorkarin cheng nuai 250 a dah tawh chu cheng nuai 150 dang pek belh turin Ministry of Tribal Affairs Secretary hnenah a thehlut a, Union Secretary chuan an pek tur thu a lo hrilh nghal a ni.
SYS Minister chuan Youth Affairs secretary Utma Chawdry pawh kâwmin, Mizorama NSS, NCC leh Bharat Scout & Guides chungchangte a sawipui a; Mizoram Governor thar RS Sreedhan Pillai nen New Delhi-ah an inkâwm bawk.