Ar puah sa Rs. 6,72,000 man inkhawihsak vangin police station-ah FIR thehluh a ni

Vairengte Arsa Zuar Association (VAZA) chuan thuchhuah siamin, November 15, Zirtawpni khan an member-te'n ar puah sa Aizawl leh khaw danga zawrh tur an phurh chu Lungdai leh Sihphir inkarah All Mizoram Poultry Farmers Association (AMPFA) nia hriatte'n an lo paihsak vek niin an tarlang. Hei vang hian police station-ah FIR an thehlut a ni.

Thu dawn danin, VAZA member-te'n ar puah sa Rs. 6,72,000 man, Zirtawpni zinga Aizawl lam pana Vairengte-Aizawl maxicab-a an phurhtir chu Lungdai chhaka Nihliap lian bulah AMPFA mi leh sa nia hriatte'n lo tiding­in an hlànthlaksak a, Lungdai chhaka an tihdin hman loh maxicab-te pawh ûm zuiin, Selesih bulah an hlânthlaksak leh bawk. Arsa zinga ṭhenkhat chu Lungdai chhaka khàmah an paih a, ṭhenkhat dang chu an tih zui dan an hre lo thung.

VAZA hruaitute chuan November 15 vêk khan Vairengte Police Station-ah FIR an thehlut a, Vairengte PS chuan an huam chhung a nih loh avangin Bawngkawn PS leh Kawnpui PS-ah an thawn nghal a ni.

VAZA-in FIR-a an tarlan danin, arsa an thawn chu báwm 40 a ni a, báwm pakhatah kg. 60 awmin, Rs. 6,72, 000 man a ni. Ar puah sa an thawnte chu Aizawla dah tur báwm 33, Champhaia thawn tur báwm pali leh Lawngtlaia thawn tur báwm pathum a ni. Arsate chu chhe thei a nih avangin a thlenna tur hmun a thlen vat theih nan hma lakpui tur leh dan anga action la turin police an ngen.

Vairengte Arsa Zuar Association chuan press release siamin, AMPFA thil tih dan chu an dem thu an tarlang a, "Hriatthiam har kan tiin kan lungawi lo tak zet a, hetianga intham lohna hi a ṭha lo tak zet. Chuvangin, thuneitute'n a ṭul anga an phû tawk hremna leh kan arsa mante kan hmuh lêt leh theih nana hma min lâksak turin kan phût tlat a ni," an ti.