MLA-in zirlai 13 hnenah ṭanpuina hlân

Human Resources Development Board vice chairman L Thangmawia, MLA chuan November 16, Inrinni khan SRDC Cell office, Venghluiah a bial, Leng­teng constituency chhunga HSSLC leh a chung lam zirlai thiam thei, khawsak 

harsa mi 13 hnenah ṭanpuina sum a hlân.

L Thangmawia chuan, chief minister Zoramthanga'n zirna a ngai pawimawh hle tih sawiin, "Mizo mipuite'n zirna ngai pawimawhtu CM kan nei hi kan vanneihzia kan la hre dawn chauh a ni," a ti a; MNF sorkar chu kum khat la tling lo mah se, zirtirtu 900 vel lak a ni tawh te, zirna lama hma latu tur Human Resources Deve­lopment Board din a nite chuan CM Zoramthanga kaihhruai sorkarin zirna a ngaih pawimawhzia a tilang niin a sawi.

Lengteng bialtu MLA chuan, amah chu chhungkaw harsa tak aṭanga lehkha zir chhuak a nih thu sawiin, "Retheihna hi chhuanlamah hman a rem lo a, chona thar min petuah kan hman thiam a pawimawh," a ti a; ṭanpuina dawngtu zirlaite chu an sum dawnte an zirna atan ṭangkai taka hmang turin a chah.

Ṭanpuina semna inkhawmah hian Ngopa SDO (Civil) Lalhruai­thluangi'n ṭanpuina dawng tur thlan dan a sawifiah a; ṭanpuina sum hi mi pasarih hnenah Rs. 10,000, mi pali hnenah Rs. 20,000 leh mi pahnih hnenah Rs. 25,000 hlan a ni.